Ulttyq ulannyń 1200-den astam sarbazy sý tasqyny bolǵan aımaqtarǵa kómekke attandy
ALMATY. KAZINFORM – Qazaqstannyń batysy men soltústigindegi sý basqan óńirlerge kómek kórsetý úshin QR ІІM-i Ulttyq ulannyń 1200-den astam jaýyngeri jiberildi, dep habarlady QR Ulttyq ulanynyń baspasóz qyzmeti.
Baspasóz qyzmetiniń málimetterine qaraǵanda, búgin sý tasqynyna qarsy is-sharalardy úılestirý jáne sý tasqyny saldaryn joıý jónindegi respýblıkalyq shtabtyń jumys keńesi ótti. Kún tártibinde sý tasqynynyń ekinshi tolqyny bolýy múmkin batys óńirlerdegi jaǵdaı basty másele retinde qaraldy.
Premer-mınıstr Oljas Bektenovtyń tapsyrmasy boıynsha Atyraý, Batys Qazaqstan jáne Soltústik Qazaqstan oblystarynyń turǵyndaryna kómektesý úshin Ulttyq ulannyń kúshteri men quraldary jiberildi. Úkimet basshysy oblys ákimdikterine keletin áskerı qyzmetshilerdi barlyq qajetti zattarmen qamtamasyz etýdi, sondaı-aq tehnıkaǵa janarmaı quıý máselesin sheshýdi tapsyrdy.
Mynadaı áskerı bólimderdiń jeke quramy men tehnıkalary qosymsha kúsh retinde jiberildi: 6506 áskerı bóliminen (Shymkent q.) 300 áskerı qyzmetshi men 15 avtomobıl Qyzylorda arqyly jolǵa shyqty, olarǵa keıin 5547 áskerı bóliminiń 200 áskerı qyzmetshisi qosyldy jáne odan ári olar Oral qalasyna deıin temir jol kóligimen 1500 shaqyrymnan astam jol júrip ótedi. Shymkent jedel brıgadasynyń sý tasqyny zardaptaryn joıý jónindegi jıyntyq otrıadyn tyl boıynsha qurama komandıriniń orynbasary podpolkovnık Saǵdat Qapashev basqardy.
- El úshin qıyn ýaqytta barlyǵymyz qolda bar kúshimiz ben quraldarymyzdy qoldanýymyz kerek. Bizge úlken jaýapkershilik júktelgen. Sý tasqynynan zardap shekken azamattarǵa kómek kórsetý úshin bar kúshimizdi salamyz, – dedi podpolkovnık Saǵdat Qapashev.
Sonymen qatar, 5451 áskerı bóliminiń (Qaraǵandy q.) 500 áskerı qyzmetshisi men 18 avtomobıli temir jol kóligimen Atyraý qalasynda bolyp jatqan sý tasqynyna qarsy jumystarǵa atsalysý úshin attandy. Joldyń uzaqtyǵy 2100 shaqyrymnan asady.
Sonymen qatar, elordalyq Ulttyq ulannyń jedel brıgadasynyń 200 áskerı qyzmetshisi Astanadan Petropavlǵa deıin 7 tehnıkamen bara jatyr. 5573 áskerı bóliminiń jeke quramy sý basqan eldi mekenderdiń kóshelerindegi baspanalardy ury-qaryǵa tonatpas úshin Soltústik Qazaqstan oblysynda qoǵamdyq tártipti qorǵaý boıynsha jaýyngerlik qyzmet atqarady.
Aıta keteıik, jalpy alǵanda, Ulttyq ulannyń 2700-den astam jaýyngeri men 120 tehnıkasy jáne avıa transporty elimizdiń barlyq sý basqan óńirlerinde belsendi kómek kórsetip jatyr. Olar sý basqan kentter men qalalarda patrýldeý arqyly turǵyndardyń jeke múlikterin qorǵaýdy qamtamasyz etýde, jaǵalaýdy nyǵaıtý jumystaryna qatysýda, sý tasqyny bolǵan eldi mekenderde sý burýdy jáne kanaldardy tazartýda. Budan bólek adamdardy, janýarlardy qaýipsiz jerlerge evakýatsııalaý jumystarymen de shuǵyldanyp júr.
Búginde quqyqtyq tártip áskerleriniń áskerı qyzmetshileri jalpy uzyndyǵy 10 shaqyrymnan asatyn aryqtardy tazartyp, ınertti materıaldary bar 233 myńnan astam qapshyq daıyndady.
