Ulttyq ulandaǵy elektrondy testileý psıhologter jumysyn jeńildetti
ASTANA. KAZINFORM — Elordalyq QR ІІM Ulttyq ulanynyń 5573 áskerı bóliminde jas sarbazdardy psıhologııalyq súıemeldeýdiń tsıfrlyq modýli engizildi, dep habarlaıdy ІІM baspasóz qyzmeti.
Bul joba merzimdi qyzmettegi áskerı qyzmetshilerdi alǵashqy testileýden ótkizýdi jaqsartýǵa baǵyttalǵan.
Júıe bólimniń ishki portalynda jumys isteıdi jáne áskerge shaqyrylýshylar kelgennen keıingi alǵashqy úsh kúnde qoldanylady. Ol úshin jergilikti jelige qosylǵan 12 avtomattandyrylǵan jumys orny jabdyqtalǵan. Sandyq portal men ádistemelerdiń elektrondy nusqalaryn merzimdi qyzmet sarbazy qatardaǵy Kım Hen Ý aǵa ofıtserlerdiń basshylyǵymen jasady.
— Úsh ádisti avtomattandyrý jobasy alty aıda mamandardyń 500 jumys saǵatyn únemdeýge múmkindik berdi. Endi testileýden ótkennen keıin júıe yqtımal táýekelderdi qysqasha taldaýmen jáne baǵalaýmen árbir áskerı qyzmetshige avtomatty túrde psıhologııalyq sıpattamany qurastyrady, — delingen habarlamada.
Psıhologııalyq qamtamasyz etý qyzmetiniń bastyǵy Janar Shakaeva atap ótkendeı, bul mamandardyń jumysyn edáýir jeńildetedi jáne jas tolyqtyrýmen jeke qarym-qatynas jasaýǵa kóbirek ýaqyt bólýge múmkindik beredi. Bul júıe shaqyrý naýqanyndaǵy qajettilikterdi tolyǵymen jaba otyryp, táýligine 100 adamǵa deıin óńdeý-testileý júrgizýge qabiletti.
Qazir joba elordalyq jedel quramada synaqtan ótkizilip jatyr. Tıimdiligi rastalǵan jaǵdaıda tsıfrlyq sheshimdi quqyqtyq tártip áskeriniń barlyq áskerı bólimderine engizý josparlanyp otyr.
Budan buryn Ulttyq ulanda baýyrlastyqty nyǵaıtýǵa arnalǵan «Ulandyq dos» jobasy engizilgenin jazdyq.
