Ulttyq ulanda jeti tilde erkin sóıleıtin polıglot sarbaz áskerı mindetin atqaryp júr
ASTANA. KAZINFORM – Taraz qalasyndaǵy QR ІІM Ulttyq ulanynyń «Ońtústik» óńirlik qolbasshylyǵyna qarasty 5513 áskerı bóliminiń sarbazy qatardaǵy Bahtııarhan Tursynhodjaev jeti tildi meńgergen. Qala ishinde qoǵamdyq tártipti qamtamasyz etý barysynda ol azamattarmen qazaq, ózbek, ázirbaıjan, orys, túrik, aǵylshyn jáne frantsýz tilderinde erkin til tabysady. Bul týraly Ulttyq ulannyń baspasóz qyzmeti málim etti.
Bahtııarhan frantsýz tilin ákesimen birge Frantsııada bolǵan kezinde meńgergen. Ol jerde arhıtektýra baǵyty boıynsha bilim alǵan. Shetelde qalyptastyrǵan tildik daǵdylary oǵan qyzmet barysynda azamattarmen tıimdi baılanys ornatýǵa jáne qoǵamdyq qaýipsizdikti qamtamasyz etý mindetterin sapaly oryndaýǵa kómektesip júr.
— Otbasynyń úlkeni — Bahtııarhan 22 jasta. Ol artynan ergen inileri men qaryndasyna úlgi bolyp keledi. Jaýapkershilik, tártip pen ózin-ózi damytýǵa degen umtylys — onyń ómirlik ustanymy. Aıta keterligi, qaryndasy da shet tilderine qyzyǵyp, bes tildi meńgergen. Bul otbasyda ákeniń «Til bilgen adam ómirde óz jolyn tabady» degen tálimi naqty nátıjesin berip otyr, — delingen habarlamada.
Qatardaǵy sarbaz Tursynhodjaevtyń aıtýynsha, bir tildi meńgerý úshin oǵan orta eseppen eki-úsh aı ýaqyt qajet. Merzimdi áskerı qyzmetin ótep júrse de, ol oqýyn toqtatpaıdy. Áskerı bólimniń komandırleri de sarbazdyń izdenisin qoldap, qajetti sheteldik ádebıetterdi tabýǵa kómektesedi.
Bahtııarhannyń jetistikteri tek til bilimimen shektelmeıdi. Ol ýshý-sanda sportynan sport sheberi, Qazaqstan Respýblıkasy chempıonatynyń qola júldegeri. Sport pen til úırený — onyń ómir saltynyń ajyramas bóligi.
Bos ýaqytynda Bahtııarhan qarýlas dostaryna shaǵyn til úırený sabaqtaryn ótkizip, óz bilimimen bólisedi. Bul ol úshin basqa tilde aýyzeki sóıleý deńgeıin jetildirýge múmkindik bolsa, endi biri úshin jańa tildi meńgerýge jasalǵan alǵashqy qadam.
Aıta keteıik, buǵan deıin Ulttyq ulan sapynda tórt egiz jup áskerı boryshyn ótep júrgenin jazdyq.