Ulttyq ulanda «Usynys alańy» keri baılanys platformasy iske qosyldy
ASTANA. KAZINFORM – Memleket basshysy aıqyndaǵan tsıfrlandyrý men jasandy ıntellektini damytý baǵyty aıasynda quqyqtyq tártip áskerlerinde ishki basqarýdyń zamanaýı tetikteri engizilip jatyr.
Sonyń biri — Ulttyq ulan Bas qolbasshysynyń tapsyrmasymen iske qosylǵan «Usynys alańy» tsıfrlyq platformasy.
Platforma Ulttyq ulannyń aqparattyq portalynda ornalastyrylǵan jáne qyzmet orny men laýazymyna qaramastan árbir áskerı qyzmetshige quqyqtyq tártip áskerlerin damytýǵa, qyzmettik úderisterdi jetildirýge qatysty usynystar engizýge múmkindik beredi.
Jobanyń negizgi qaǵıdaty — keri baılanys pen «estıtin qolbasshylyq» ustanymy. Platformaǵa kelip túsken árbir usynys áskerdi damytýǵa baǵyttalǵan naqty qural retinde qarastyrylady.
Búginde platforma arqyly 155 usynys kelip tústi. Onyń 120-sy ózekti dep tanylyp, jumysqa qabyldandy. Bastamalar jaýyngerlik jáne jedel-qyzmettik ázirlik, ınjenerlik-tehnıkalyq qamtamasyz etý, uıymdastyrýshylyq-shtattyq is-sharalar, tárbıelik jáne áleýmettik-quqyqtyq jumys, sondaı-aq basqa da mańyzdy baǵyttardy qamtıdy.
Kelip túsken usynystar Bas qolbasshylyqtyń beıindi sarapshylarymen 15 kún ishinde qaralady.
Eshbir bastama jaýapsyz qalmaıdy, onyń ishinde iske asyrýǵa jatpaıtyn usynystar da nazardan tys qalmaıdy. Mundaı jaǵdaıda áskerı qyzmetshige sebepteri túsindirilgen saraptamalyq qorytyndy men ıdeıany odan ári pysyqtaýǵa qatysty usynymdar beriledi.
«Usynys alańy» áskerı qyzmetshiler bastamasynyń naqty nátıjege ulasatynyn kórsetýde. Árbir usynys nazarǵa alynyp, áskerdi damytýǵa baǵyttalǵan mańyzdy qadamǵa aınalýy múmkin.
Aıta ketelik Ulttyq ulanda kadrlyq aýys-túıis bolǵan edi.