Ulttyq ulanda merzimdi qyzmet sarbazdary dron basqarýdy úırenip jatyr
ASTANA. KAZINFORM – Oqý synybynda ulandyqtar drondardyń qurylymyn, olardy basqarý erejelerin, tehnıkalyq qyzmet kórsetý tártibin jáne taktıkalyq qoldaný negizderin meńgeredi.
QR ІІM Ulttyq ulanynyń Túrkistan qalasyndaǵy 5574 áskerı bóliminiń merzimdi qyzmet sarbazdary ushqyshsyz ushý apparattaryn basqarýdy meńgerip jatyr. Jyl basynan bastap dron operatorlaryn daıarlaý quqyqtyq tártip áskerleriniń jaýyngerlik daıarlyq baǵdarlamasyna engizildi. Bul sarbazdarǵa zamanaýı áskerı-qoldanbaly daǵdylardy ıgerip, jańa mamandyqty meńgerýge múmkindik beredi.
Áskerı qyzmetshilerdiń daıarlyǵy jas jaýynger kýrsynan bastalady. Bul kezeńde olar jalpyáskerı jarǵylardy zerdelep, saptyq jáne atys daıarlyǵynan ótedi, áskerı kún tártibine beıimdelip, bólimshe quramynda áreket etýdi úırenedi. Sonymen qatar drondardy basqarý boıynsha da bilim alady.
Oqý synybynda ulandyqtar drondardyń qurylymyn, olardy basqarý erejelerin, tehnıkalyq qyzmet kórsetý tártibin jáne taktıkalyq qoldaný negizderin meńgeredi. Baǵdarlama aıasynda komandırden, FPV-dron operatorynan, oq-dáriler jónindegi mamannan jáne barlaý operatorynan turatyn jaýyngerlik eseptop daıarlanady.
Oqytý kezeń-kezeńimen júrgiziledi. Aldymen ár áskerı qyzmetshi óz mamandyǵy boıynsha qajetti daǵdylardy ıgeredi, sodan keıin toptyq jattyǵýlarǵa qatysady. Bul eseptop músheleriniń ózara úılesimdi áreket etýin pysyqtap, mindetterdi birlese oryndaý daǵdylaryn qalyptastyrady.
Daıyndyqtan ótken sarbazdar patrýldik qyzmetke kirisip, Túrkistan qalasynda qoǵamdyq tártipti saqtaýǵa jáne turǵyndar men qala qonaqtarynyń qaýipsizdigin qamtamasyz etýge atsalysady.
Zamanaýı tehnologııalar áskerı istiń ajyramas bóligine aınalyp keledi. Sondyqtan ulandyqtardyń merzimdi áskerı qyzmet kezinde jańa tehnologııalar men jumys tásilderin meńgerýi mańyzdy. Dron operatorlaryn daıarlaý áskerı qyzmetshilerdiń kásibı múmkindikterin keńeıtip, zaman talabyna saı daıyndalýyna jáne qoǵamdyq qaýipsizdikti qamtamasyz etý mindetterin tıimdi oryndaýyna yqpal etedi.
Aıta ketelik Aqmola polıtsııasy joǵalǵan adamdardy izdeýde drondardy qalaı qoldanatyny týraly jazǵan edik.
