Ulttyq ulanda qarý-jaraq pen áskerı tehnıkanyń daıyndyǵy tekserildi
ASTANA. KAZINFORM — QR ІІM Ulttyq ulanynyń áskerı bólimderinde qarý-jaraq pen áskerı tehnıkany baıqaý aıaqtaldy, dep habarlaıdy QR ІІM Ulttyq ulanynyń baspasóz qyzmeti.
Іs-shara aǵymdaǵy jylǵa arnalǵan jaýyngerlik jáne jedel daıyndyq josparyna sáıkes uıymdastyryldy.
Birneshe kún boıy mamandar brondy tehnıka men arnaıy avtokólikterdiń tehnıkalyq jaı-kúıin baǵalap, olardyń tolyq jaraqtalýyn, syrtqy jaǵdaıyn jáne qyzmettik-jaýyngerlik mindetterdi oryndaýǵa daıyndyǵyn tekserdi. Sondaı-aq paıdalaný qujattamasynyń bolýy men onyń talapqa saı júrgizilýine erekshe nazar aýdaryldy.
Quqyqtyq tártip áskerleri úshin qarý-jaraq pen áskerı tehnıkanyń tehnıkalyq jaramdylyǵy aıryqsha mańyzǵa ıe. Sebebi bul bólimshelerdiń jedel qımyldaý qabiletine, qoıylǵan mindetterdiń ýaqytyly oryndalýyna jáne áskerı qyzmetshilerdiń qaýipsizdigine tikeleı áser etedi.
— Tehnıkalyq baıqaý barysynda mamandar árbir tehnıka birliginiń jaı-kúıin muqııat zerdelep, ony paıdalaný jáne tehnıkalyq qyzmet kórsetý talaptarynyń saqtalýyn jan-jaqty tekserdi. Mundaı júıeli baqylaý yqtımal kemshilikterdi der kezinde anyqtap, olardy joıýǵa, sondaı-aq tehnıkanyń turaqty ázirlik deńgeıin qamtamasyz etýge múmkindik beredi, — delingen habarlamada.
Turaqty ótkiziletin tehnıkalyq tekserýler qarý-jaraq pen áskerı tehnıkanyń senimdi ári jaramdy kúıde saqtalýyna yqpal etip, jeke quramnyń senip tapsyrylǵan múlikke degen jaýapkershiligin arttyrady jáne áskerı tártiptiń nyǵaıýyna negiz bolady.
Buǵan deıin Ulttyq ulanda áskerı polıtsııanyń jedel jelisi iske qosylǵany belgili boldy.
