Ulttyq ulannyń áskerı qyzmetshileri saılaýǵa belsendi qatysyp jatyr
ASTANA. KAZINFORM — Quryltaı saılaýynda daýys berýge QR ІІM Ulttyq ulanynyń áskerı qyzmetshileri belsendi qatysyp jatyr. Ulttyq ulannyń 36 ýchaskesinde daýys berý bastaldy.
Áskerı bólimderdiń aýmaǵynda 36 saılaý ýchaskesi jumys istep tur. Bul ulandyqtarǵa qyzmet ótkerý orny boıynsha tikeleı daýys berýge múmkindik berdi.
Saılaý ýchaskesinde alǵashqylardyń biri bolyp Іshki ister mınıstriniń orynbasary — Ulttyq ulannyń Bas qolbasshysy general-leıtenant Ańsaǵan Baltabekov daýys berdi. Ol tańǵy saǵat 6:00–de elordalyq 5573 áskerı bóliminiń aýmaǵynda ornalasqan № 266 saılaý ýchaskesine kelip, óz tańdaýyn jasady.
Bas qolbasshy óz úlgisimen ár azamattyń el bolashaǵyna jaýapkershilikpen qarap, ony aıqyndaýǵa belsendi qatysýynyń mańyzyn kórsetti.
Daýys berýge ofıtserler, kelisimshart boıynsha jáne merzimdi áskerı qyzmetshiler, olardyń otbasy músheleri, sondaı-aq Ulttyq ulan ardagerleri qatysyp jatyr. Kóptegen jas sarbaz alǵash ret daýys berdi. Ulandyqtar arasynda týǵan kúninde saılaý ýchaskesine kelip, óz tańdaýyn jasaǵandar da boldy.
Ulttyq ulannyń jeke quramy mańyzdy qoǵamdyq-saıası naýqanǵa qatysýymen qatar, ózine júktelgen qyzmettik-jaýyngerlik mindetterin oryndaýdy jalǵastyryp jatyr. Kún saıyn elimizdiń 21 qalasynda 7 myńnan astam áskerı qyzmetshi qoǵamdyq tártipti saqtaý men azamattardyń qaýipsizdigin qamtamasyz etý qyzmetine jumyldyrylǵan. Saılaý ótetin kúni jáne daýys berý aıaqtalǵannan keıin de ulandyqtar turaqty ári qaýipsiz jaǵdaıdy qamtamasyz etý úshin barlyq qajetti sharalardy qabyldaıdy.
Buǵan deıin Qostanaıdaǵy QR Ulttyq ulanynyń 6697 áskerı bóliminde ornalasqan № 27 saılaý ýchaskesinde 300-den astam áskerı qyzmetshi daýys berip jatqandyǵy jóninde habarladyq.
