Ulttyq ulanda bes túrki tilin jetik meńgergen sarbaz qyzmet etip júr

ASTANA. KAZINFORM – 5 qyrkúıek – Qazaqstan halqy tilderi kúni. Bul mereke halyqtar arasyndaǵy dostyq pen tatýlyqtyń, til baılyǵynyń mańyzyn aıshyqtaıdy. Osyndaı qundylyqtardy boıyna sińirgen, bes túrki tilin jetik meńgergen qatardaǵy Vladımır Kopylov QR ІІM Ulttyq ulanynyń 5571 áskerı bólimi sapynda qyzmet etip júr.

Ulty orys bolsa da, Vladımır qazaq tilin jetik bilip qana qoımaı, ózbek, qyrǵyz, uıǵyr jáne tatar tilderinde erkin sóıleıdi. Ulttyq ulan qataryna Shymkent qalasynan shaqyrylǵan Vladımırdiń til bilýge degen qyzyǵýshylyǵy bala kezinen qalyptasqan. Ol túrki áleminiń tilderin meńgerýdi maqsat tutqan.

– Armanym – barsha túrki tilderinde sóılep, ulttar arasyndaǵy dostyqty nyǵaıtý, – deıdi ózi.

Aıta ketsek, Vladımır túrki tilderiniń ishindegi sırek qoldanylatyn qarashaı, qaraqalpaq jáne noǵaı tilderinde sóıleı alady.

Til bilýdiń paıdasyn ulandyq kúndelikti qyzmet barysynda sezinedi. Ol úshin patrýldik qyzmette Almaty shahary turǵyndarynyń qaýipsizdigin qamtamasyz etý de, túrli ult ókilderimen til tabysý da esh kedergi keltirmeıdi. Qazaqqa qazaqsha, ózbekke ózbekshe, uıǵyrǵa uıǵyrsha jaýap berip turǵan Vladımırdi kórgende, qarýlastary da tańdaı qaǵady.

Tek til bilimimen ǵana emes, ónerimen de erekshelenetin Vladımır rotadaǵy eń belsendi, áskerı qyzmettiń úzdik sarbazdarynyń biri. Qarýlastary shashyn qıdyrǵysy kelse, Vladımırge barady, sebebi ol – naǵyz sheber shashtaraz. Odan bólek áskerı bólimniń mobılografy.

Kúndelikti qyzmetti, jaýyngerlik ómirdiń qyzyqty sátterin beınege túsirip, áskerı bólimniń áleýmettik jelidegi ımıdjin qalyptastyryp júr.Ulttyq ulan búginde naǵyz talanttar ordasyna aınalyp úlgerdi.

Quqyqtyq tártip áskeriniń ár bóliminde osyndaı segiz qyrly, bir syrly sarbazdar saqshylarmen birlesip elimizdiń 21 qalasynda qoǵamdyq tártipti qadaǵalaıdy.

Buǵan deıin 15 tilde sóıleıtin qazaq qyzy týraly jazǵan bolatynbyz.