Ulttyq ulanda baýyrlastyqty nyǵaıtýǵa arnalǵan «Ulandyq dos» jobasy engizildi
ASTANA. KAZINFORM — QR ІІM Ulttyq ulanynda áskerı ortadaǵy ózara qoldaý men jaýyngerlik baýyrlastyqty nyǵaıtý maqsatynda «Ulandyq dos» jobasy qolǵa alyndy, dep habarlaıdy vedomstvonyń baspasóz qyzmeti.
Bul bastama elordada ornalasqan 5573 áskerı bólimindegi merzimdi áskerı qyzmetshiler arasyndaǵy senimdi arttyrýǵa baǵyttalyp, alǵashqy oń nátıjelerin kórsetip jatyr.
Jańa júıede sarbazdar 2-5 adamnan shaǵyn toptarǵa biriktiriledi. Olar qyzmet barysynda da, kúndelikti áskerı ómirde de bir-birine tirek bolyp, týyndaǵan máselelerdi sheshýge jáne moraldyq turaqtylyqty saqtaýǵa kómektesedi. Bastama sheńberinde ár óńirden kelgen jastar bir-birine baýyr basyp úlgerdi.
Máselen, Shymkentten merzimdi áskerı qyzmetke shaqyrtylǵan qatardaǵy Muhamedáli Quralbek pen Semeı týmasy Danııar Keńesov alǵashynda bir-birine múlde beıtanys bolǵan. Muhamedáli Ulttyq ulan sapyna Danııardan keıin qosylǵan. Jańa orta, jańa talap, jańa tártip — ár sarbaz úshin jaýapty kezeń. Sol sátte Danııar jańadan kelgen qarýlasyna alǵashqy kúnnen-aq qoldaý bildirip, áskerdiń kún tártibine tez beıimdelýine kómektesti.
«Ulandyq dos» aıasynda bir topqa biriktirilgennen keıin jigitter qysqa ýaqyt ishinde til tabysyp ketti. Olar birge jaýyngerlik kezekshilikke túsedi, jaýyngerlik daıyndyqta bir-birine kómektesedi, tapsyrmany qatar oryndaıdy. Bireýi sharshap tursa, ekinshisi demep jiberedi. Osyndaı ózara senim olardyń áskerı ujymǵa tez sińisip ketýine múmkindik bergen.
— Bos sátterde biz jıi áńgimelesip, týǵan jerimizdi eske alamyz. Men Danııarǵa ońtústiktiń salt-dástúrin aıtyp beremin, al ol semeılik óńirdiń erekshelikterimen bólisedi. Osylaısha saptaǵy seriktestik birte-birte shynaıy dostyqqa aınaldy, — deıdi qatardaǵy Muhamedáli Quralbek.
Bólim qolbasshylyǵynyń aıtýynsha, bul tásil komandırlerge jeke quramnyń kóńil kúıin baqylaýǵa, týyndaǵan máselelerdi der kezinde anyqtaýǵa kómektesedi. Aıta ketsek, joba qazir pılottyq formatta iske asyrylýda. Eger bastama óz nátıjesin kórsetse, «Ulandyq dos» ádistemesi Ulttyq ulannyń barlyq áskerı bólimine engizilmek.
Osyǵan deıin QR Ulttyq ulanynyń Án-bı ansambli Máskeýde ótken áıgili «Ný-ka, vse vmeste! Horom!» vokaldyq shoýyna qatysyp, qazylar alqasy men kórermendi erekshe tájirıbesimen tańdaı qaqtyrdy.