Ulttyq ulanda árbir 10-shy sarbaz kelisimshart boıynsha áskerı qyzmette qalady
ASTANA. KAZINFORM – Bıyl 700-ge jýyq sarbaz Ulttyq ulannyń jan-jaqtaǵy áskerı bólimderinde qyzmetin jalǵastyrýǵa sheshim qabyldady. Bul – jastardyń áskerı qyzmetke degen qyzyǵýshylyǵy men Otan qaýipsizdigin qamtamasyz etý jolyndaǵy jaýapkershiliginiń artyp kele jatqanyn kórsetedi.
Mysaly, bir ǵana 5573 brıgadasynda óz boryshyn ótegen 100 sarbaz merzimdi áskerı qyzmet barysynda jınaǵan tájirıbesin kásibı deńgeıde jalǵastyryp, el qaýipsizdigin qamtamasyz etýge úles qosýdy maqsat etip otyr.
Elordalyq brıgadanyń saptyq alańynda kásibı áskerı qyzmetke qalyp jatqan sarbazdardy Іshki ister mınıstriniń orynbasary – Ulttyq ulannyń Bas qolbasshysy general-leıtenant Ańsaǵan Baltabekov quttyqtady. Kezdesý barysynda áskerı qyzmettiń artyqshylyqtary men bolashaq múmkindikteri de aıtyldy.
Sondaı-aq áskerı qyzmetke qalǵan jas mamandarǵa qyzmettik baspana kiltteri tabystaldy. Mundaı bastama áskerı qyzmetshilerdi áleýmettik turǵydan qoldaýǵa jáne olardyń qyzmetke degen yntasyn arttyrýǵa baǵyttalǵan.
- Aldaǵy ýaqytta atalǵan sarbazdar jaýapty laýazymdarǵa taǵaıyndalyp, jeke quramnyń qyzmetin jetildirýge atsalysady. Osylaısha, áskerı áleýet pen áleýmettik qoldaýdyń úılesimi jastardyń áskerı mamandyqty sanaly túrde tańdaýyna jol ashyp otyr. Keıingi jyldary Ulttyq ulan zamanaýı tehnıkalarmen qarqyndy túrde jabdyqtaldy. Jańa brondy kólikter, jetildirilgen baılanys quraldary, arnaıy maqsattaǵy tehnıkalar – munyń bári áskerı qyzmettiń sapasyn jańa deńgeıge kóterdi, - delingen habarlamada.
Aıta keteıik, búginde 7 myńnan astam ulandyq elimizdiń 21 qalasynda qoǵamdyq tártipti kúzetedi. Sondaı-aq 2 myńnan asa sarbaz memlekettik mańyzy bar nysandar men QAJ mekemeleriniń qaýipsizdigin qamtamasyz etip júr.
Elimizde Prezıdent Jarlyǵyna sáıkes 2026 jylǵy 17 naýryz ben 30 maýsym aralyǵynda ótetin kóktemgi áskerge shaqyrý naýqany áli jalǵasyp jatyr.
