Ulttyq ulanda alǵash ret «aǵa sarbazdar» ınstıtýty engizildi
ASTANA. KAZINFORM — QR ІІM Ulttyq ulanynda tárbıe jumysyn jetildirý jáne qyzmet ótkerý jaǵdaıyn jaqsartý maqsatynda 5573 áskerı bóliminde «aǵa sarbazdar» ınstıtýty engizilip jatyr.
Ulttyq ulannyń baspasóz qyzmetiniń dereginshe, bul bastama merzimdi qyzmet áskerı qyzmetshileri arasyndaǵy tálimgerlik júıesin damytýǵa baǵyttalyp, alǵashqy oń nátıjelerin kórsetip otyr.
— Jańa úlgi boıynsha tártiptiligimen, kóshbasshylyq qasıetimen jáne qyzmetke jaýapkershilikpen qaraýymen erekshelengen joǵary shaqyrylymdaǵy sarbazdarǵa úshinshi biliktilik synyby men «aǵa sarbaz» mártebesi beriledi. Olar óz qaramaǵyna birneshe jas sarbazdy alyp, olardyń beıimdelýine, turmystyq jaǵdaıynyń uıymdastyrylýyna, tártip pen moraldyq-psıhologııalyq ahýaldy saqtaýǵa kómektesedi. Aǵa sarbazdar qamqorlyǵyndaǵy jas sarbazdardy mádenı jáne patrıottyq is-sharalarǵa bastap baryp, tálimgerlik jáne úlgi kórsetýshilik rólin atqarady, — delingen habarlamada.
Jańa júıeniń erekshe belgisi retinde aǵa sarbazdarǵa qyzyl-qońyr jolaq keýdeshe beriledi, ol olardyń qyzmet ótkerýdegi erekshe mártebesin aıqyndaıdy.
Astana brıgadasynyń basshylyǵy atap ótkendeı, bul júıe kelisimshart boıynsha qyzmettegi áskerı qyzmetshilerdiń júktemesin azaıtyp, kúndelikti tárbıe jáne baqylaý máselelerinde oń áserin tıgizip keledi. Qazirgi tańda 15-ten astam aǵa sarbaz kelisimshart negizinde qyzmetin jalǵastyrý múmkindigin paıdalandy. Bul olardyń áskerı qyzmetke degen yntasynyń artqanyn jáne ortaq iske qosqan jeke úlesiniń mańyzdylyǵyn tereń túsinetinin kórsetedi. Saltanatty jaǵdaıda olarǵa áskerı bólim aýmaǵyndaǵy jataqhanadan jeke bólmelerdiń kiltteri tabystaldy.
«Aǵa sarbazdar» ınstıtýtynyń engizilýi — Ulttyq ulannyń Bas qolbasshylyǵynyń bastamasy jáne qoldaýy arqasynda júzege asyp jatyr. Bul qadam — qyzmet ótkerý jaǵdaılaryn jaqsartýǵa, áskerı tártipti nyǵaıtýǵa jáne jeke quram arasynda ujymdyq rýh qalyptastyrýǵa baǵyttalǵan keshendi jumystyń bir bóligi bolyp sanalady.
Bul bastamalar bólimsheler ishinde urpaqtar sabaqtastyǵyn qamtamasyz etip qana qoımaı, jaýapkershiligi mol, yntaly ári uıymshyl jeke quram qalyptastyrýǵa yqpal etedi. Mundaı sarbazdar quqyqtyq tártip áskerleriniń aldynda turǵan mindetterdi tıimdi oryndaýǵa qabiletti.
Aıta ketý kerek, jańa júıe Astana brıgadasynda synaqtan ótkizilip jatyr. Eger tájirıbe óz tıimdiligin dáleldese, «aǵa sarbazdar» ınstıtýty Ulttyq ulannyń barlyq áskerı bólimderinde engizilmek.
Osyǵan deıin Ulttyq ulanda bes túrki tilin jetik meńgergen sarbaz qyzmet etip júrgenin jazdyq.