Ulttyq ulan Shymkenttegi áskerı qyzmetshiniń ólimine qatysty túsinikteme berdi
ShYMKENT. KAZINFORM – Ulttyq ulannyń baspasóz qyzmeti Shymkent qalasyndaǵy 6506 áskerı bóliminde boryshyn ótep jatqan merzimdi áskerı qyzmetshiniń qaıtys bolý jaǵdaıyna baılanysty resmı túsinikteme berdi.
– Áskerı qyzmetshi áskerı bólimge 2025 jylǵy 9 jeltoqsanda kelgen. Ol alǵash ret medıtsınalyq kómekke 17 jeltoqsanda júgindi. Osy sátten bastap oǵan qajetti medıtsınalyq kómek kórsetilip, taldaýlar taǵaıyndalyp, tıisti tekserýler júrgizildi. Ol medıtsınalyq mamandardyń turaqty baqylaýynda boldy. 29 jeltoqsanda densaýlyǵynyń kúrt nasharlaýyna baılanysty ony aýrýhanaǵa jatqyzý qajettiligi týyndap, Shymkent qalasyndaǵy medıtsınalyq mekemelerdiń birine jetkizildi. Ókinishke qaraı, 2026 jylǵy 6 qańtarda barlyq qabyldanǵan sharalar men kórsetilgen medıtsınalyq kómekke qaramastan, júrek qyzmetiniń toqtaýy tirkeldi. Aldyn ala dıagnoz – jedel leıkoz, - delingen habarlamada.
Atalǵan is erekshe baqylaýǵa alynǵany atap ótildi.
– Osy derek boıynsha áskerı-tergeý departamenti qylmystyq is qozǵady. Qazirgi ýaqytta barlyq qajetti protsessýaldyq is-sharalar júrgizilip jatyr. Tergeý barysy áskerı prokýratýranyń baqylaýynda, - dep túsindirdi vedomstvo ókili.
Budan buryn Shymkentte sarbazdyń qaıtys bolýyna qatysty qylmystyq is qozǵalǵanyn jazǵan edik.