Ulttyq ulan sarbazynyń bir kúni - fotoreportaj
ASTANA. KAZINFORM – 10 qańtar - Ulttyq ulan áskerı qyzmetshileriniń kúni. Osy oraıda, elorda irgesindegi №5573 bólimshesine arnaıy baryp, ІІM Іshki áskeri sarbazynyń kúni qalaı ótetinin kórip qaıttyq.
Atap aıtqanda, №5573 áskerı bólimshesi Astananyń irgesindegi Qaraótkel aýylynda jáne bul jerde Ulttyq ulannyń bas shtaby ornalasqan.
Aldymen, áskerı bólimsheniń rota komandıri, aǵa leıtenant Dastan Jumabekovti áńgimege tarttyq. Ol bólimshedegi barlyq protseske jaýapty, onyń ishinde oqý-jattyǵý, ishki tártip, qoǵamdyq sharalarǵa qatysý jáne áskerı tárbıe qyzmeti bar.
- Ulttyq ulannyń basty mindetteriniń biri – qoǵamdyq tártipti kúzetý. Sarbazdar kúndelikti oqý-jattyǵýdan bólek, qoǵam tynyshtyǵyn kúzetedi. Árıne, árqashan kezekshilikke shyǵarda nusqaýlyqpen tanysady. Jalpy, ulandardyń áskerı qyzmeti eki bólikten turady, teorııalyq jáne praktıkalyq. Teorııa kezinde arnaıy pánderdi oqıdy, sodan soń praktıka, ıaǵnı oqý-jattyǵý, sap túzeý, arnaıy quraldarmen jumys isteý, áskerı qyzmetke qatysty normatıvterdi oryndaıdy, - dedi Dastan Jumabekov.
Qyzylordalyq Narıman Shúkirálı Ulttyq ulan qataryna byltyr mamyrda qabyldanypty. Otan aldyndaǵy mindetin óter aldyndaǵy áskerı-medıtsınalyq tekseris kezinde aǵa serjanttar Ulttyq ulanǵa barýǵa keńes bergen.
- Tańerteń saǵat 6:00-de turamyz, tósegimizdi jınap, tańǵy jattyǵýdan soń jýynyp-shaıynyp, sappen tańǵy asqa baramyz. Sosyn rotaǵa kelip sabaq oqımyz, ol túske deıin jalǵasady. Túski as ishken soń, áskerı formamyzdy tekserip, tapsyrmaǵa daıyndalamyz, ıaǵnı tapsyrma - qoǵamdyq tártipti jáne obektilerdi kúzetý. Onyń aldynda sapqa turyp, komandır bizdiń mindetimizdiń retin aıtady. Qoǵamdyq tártipti kúzetýde ár sarbazdyń óz mindeti bolady, ol buıryqpen bekitiledi jáne jiti túsindiriledi. Tústen keıin, saǵat 16:00-de qalaǵa shyǵamyz, kezekshilik 23:00-ge deıin jalǵasady, - deıdi Narıman Shúkirálı.
ІІM Іshki ásker sarbazdary aptanyń alty kúni qyzmet etedi, jeksenbi – demalys. Demalysta olar bos ýaqytyn ózderine arnaıdy, ıaǵnı kún kitap oqý, teledıdar kórý sııaqty úıdegideı qarapaıym tirlikpen ótedi.
Qoǵamdyq tártipti kúzetýge kelsek, bir patrýldik jasaqtyń quramyna úsh sarbaz kiredi. Onyń biri - áskerı jasaq bastyǵy.
- Bizge 4 núkteni kúzetý júkteledi, ár núktege jetýge 15 mınýt ýaqyt beriledi. Qolymyzda karta bolady, sonymen qatar qyzmettik dápterimiz bar. Odan bólek, ratsııa, rezeńke taıaq, kisen, ysqyrǵysh, jazdygúni sý bótelkesi jáne rásimdeý qaǵazy beriledi. Kóshede kúdikti adamdy baıqasaq, aldymen syrttaı baqylaımyz. Іs-áreketi kúmán týdyrsa, qasyna baryp ózimizdi tanystyryp, jón-josyq suraımyz, osy aralyqta basshylyqqa ratsııamen eskertemiz. Sondaı-aq, qajet jaǵdaıda kúdiktiden jeke kýáligin talap etemiz. Eger kúdikti tártipke baǵynbaı jatsa, kúsh qoldanýǵa quqyǵymyz bar jáne jaqyn mańdaǵy polıtsııa beketine jetkizemiz, - deıdi jas sarbaz.
Patrýldik qyzmet kezinde ulandyqtar túrli jaǵdaıǵa tap bolýy múmkin. Kóshede qoǵamdyq tártipti kúzetý mindetinen bólek, sarbazdar kómek suraǵan jandarǵa qol ushyn sozýǵa árdaıym daıyn. Áńgime barysynda Narıman Shúkirálı kezekti patrýldeý kezinde kósheden symsyz qulaqqap (AirPods) taýyp alyp, ıesine qaıtaryp berip, qýantqanyn aıtty. Sol sııaqty uıaly telefon, ámııan, taǵy basqa da adamdardyń jeke zattaryn taýyp, ıelerine qaıtarǵan jaıttar bolypty.
- Kúzette turǵanda aýyr júkpen kele jatqan úlken áıel kisini baıqap, zattaryn kóterip aparyp berdik. Osy sekildi mysal kóp. Ár saǵat saıyn komandırge esep berip otyramyz, osylaısha bizdi tekserip otyrady, - deıdi Narıman Shúkirálı.
Rota komandıriniń aıtýynsha, Ulttyq ulan sarbazdarynyń jumysy tótenshe jaǵdaılar kezinde, sondaı-aq elimizde bolatyn aýqymdy is-sharalar kezinde qyza túsedi. Jaýapkershilik júgi salmaqty.
Atap aıtsaq, byltyr elordada halyqaralyq jáne respýblıkalyq mańyzy bar birqatar is-shara ótti. Onyń qatarynda Shanhaı yntymaqtastyq uıymynyń sammıti, Dúnıejúzilik kóshpendiler oıyndary, odan bólek jyl ishinde birneshe eldiń memleket basshylary elordaǵa resmı saparmen keldi. Sheteldik meımandardyń qaýipsizdigin kúzetýde ulandyqtardyń da úlesi bar, olar kúsheıtilgen rejımde qyzmet etedi.
Sonymen qatar byltyr kóktemgi sý tasqyny kezinde Ulttyq ulan sarbazdary apatpen alysqandardyń aldyńǵy qatarynda boldy.
- Bizde jaýyngerlik qyzmet bólimshesi bar, qoǵamdyq tártipti kúzetýge qatysty ótinimder sol bólimshege túsedi. Odan ári jaýyngerlik qyzmet bólimshesi keste quryp, tapsyrmany ár rotaǵa bólip beredi, sol sııaqty ol jerde naqty is-qımyl jospary da bolady. Jospardy aldyn ala bir apta buryn berip qoıady, soǵan saı daıyndalyp tapsyrmany oryndaýǵa kirisemiz, - deıdi ol.
Osy oraıda, rota komandıri erlik jasap, erekshe kózge túsken sarbazdardy yntalandyrý sharalarynyń baryn da aıtty.
- Erekshe elengen sarbazǵa 10 kún demalys beriledi. Mysaly, byltyr elordada bolǵan oqıǵa: eki mektep oqýshysy ózendi júzip ótýge bástesedi, júzip bara jatqanda bireýiniń tamyry tartylyp sýǵa bata bastaıdy, sol mańaıda patrýlde júrgen bizdiń jasaq dereý sýǵa sekirip kómektesti. Osylaısha, qatardaǵy Mahmet degen sarbaz balanyń ómirin aman alyp qaldy. Sarbazdyń erligi elendi, 10 kún úıine demalysqa baryp keldi. Sonymen qatar Tótenshe jaǵdaılar mınıstrliginen, Іshki ister mınıstrliginen marapat aldy. Aıta bersem, osy sekildi ulandyqtardyń erligi kóp, bul bir jaǵynan basqa da sarbazdardy yntalandyrady, - deıdi D. Jumabekov.
Aıta ketsek, Ulttyq ulan sarbazdarynyń kýratory bar, bir kýrator eki sarbazǵa jaýapty, ıaǵnı tikeleı jumys isteıdi. Sonymen qatar sarbazdarǵa psıholog kómegi usynylady. Odan bólek, áskerı mindetin ótep bolǵan soń joǵary bilim alǵysy keletin ulandyqtarǵa memlekettik grant qarastyrylǵan. Sondaı-aq Otan aldyndaǵy boryshyn óteý kezinde kredıti bar sarbazdarǵa keıin tóleý múmkindigi beriledi.
- Búgin bizde jańa áskerı daıyndyq jyly bastaldy. Jańa jyl keldi, demek aldymyzda jańa mindet pen talap tur. Áskerı jıynda jeke quramǵa Qazaqstan Respýblıkasynyń quqyqtyq tártibi túsindirildi, sonymen qatar Ulttyq ulannyń ótken jylǵy jumysyn qorytyndylap, aldaǵy mindetter aıtyldy. Qoǵamdyq tártipti kúzetý boıynsha bizge júkteletin tapsyrmany talqyladyq. Memleket basshysynyń jáne Ulttyq ulan Bas qolbasshysynyń tapsyrmasyna sáıkes bıyl elimizde birqatar aıtýly shara ótkeli otyr. Sonyń biri - elordada Jeńistiń 80 jyldyǵyna oraı áskerı parad ótedi. Aýqymdy áskerı sharaǵa bizdiń sarbazdar belsene qatysady dep josparlap otyrmyz, ıaǵnı ulandyqtar marshqa qatysady, odan bólek qoǵamdyq tártipti, meımandardyń qaýipsizdigin kúzetedi, - dedi №5573 áskerı bólimshesi komandıriniń tárbıe jáne áleýmettik-quqyq jumys jónindegi orynbasary, podpolkovnık Tımýr Rahymov.
Aıta keteıik, 1992 jyly 10 qańtarda Qazaqstan Respýblıkasy Prezıdentiniń Jarlyǵymen Qazaqstan Respýblıkasy ІІM Іshki áskeri quryldy. 2014 jyldyń 21 sáýirinde Qazaqstan Respýblıkasy Prezıdentiniń Jarlyǵymen Qazaqstan Respýblıkasy ІІM Іshki áskerleri Qazaqstan Respýblıkasynyń Ulttyq ulany bolyp qaıta quryldy.
Eske salsaq, Ulttyq ulan sarbazdary 2024 jyly qandaı qylmystardy ashýǵa atsalysqany týraly jazylǵan bolatyn.