Ulttyq ulan sarbazy 100-ge jýyq kúıdi jatqa biledi
ASTANA. KAZINFORM — Almaty qalasyndaǵy ІІM Ulttyq ulany 5571 áskerı bóliminiń merzimdi áskerı qyzmetshisi Ázız Temirbek jaýyngerlik mindetin abyroımen oryndap, ulttyq ónerdi nasıhattap júrgen jas talanttardyń biri.
18 jastaǵy Ázız Qyzylorda oblysy Syrdarııa aýdanynda dúnıege kelgen. Bala kezinen dombyraǵa áýes bolyp ósken ol mektep qabyrǵasynda alǵashqy ustazy Gúlnaz Seralıevadan kúı óneriniń álippesin úırenedi. Keıin Qyzylorda qalasyndaǵy Qazanǵap atyndaǵy mýzykalyq joǵary kolledjinde bilim alyp, ustazy Jansultan Jumabekten kúıshilik sheberligin shyńdaıdy.
Búginde ulandyq júzge jýyq kúıdi jatqa biledi. Onyń oryndaýynda qazaqtyń áıgili kúıleri — «Saryarqa», «Serper», «Aqsaq kıik», «Tóremurat», «Baıjuma» syndy týyndylar erekshe áser qaldyrady. Ázızdiń aıtýynsha, tanymal kúılerdiń basym bóligin ol nota arqyly meńgergen.
— Dombyra men úshin halqymyzdyń mádenıetin, salt-dástúrin aıqyndaıtyn qasıetti mura. Ásker qatarynda júrsem de, «Syr eli, jyr eli» dep erekshelenetin Syr kúı mektebi ókilderiniń izin jalǵap júrgenime qýanyshtymyn, — deıdi qatardaǵy jaýynger.
Qazirgi ýaqytta Ázız áskerı bólimniń quramynda Almaty qalasynyń qoǵamdyq tártibin qamtamasyz etip, azamattardyń qaýipsizdigin kúzetýde. Al bos ýaqytynda qarýlastarynyń ótinishimen dombyrasyn qolyna alyp, ózi biletin kúılerdi tamyljyta oryndap beredi. Onyń áserli oryndaýyndaǵy kúıler sarbazdardyń kóńil-kúıin kóterip, jaýyngerlik rýhyn arttyra túsedi.
Ulttyq ulan qatarynda áskerı qyzmetin ótep júrgen jastardyń arasynda osyndaı ónerli azamattardyń bolýy ulttyq mádenıettiń sabaqtastyǵyn kórsetedi. Dombyranyń qońyr úni arqyly Ázız Temirbek qasıetti óner tinin úzbeı, qazaqtyń ǵasyrlardan jetken kúı dástúrin jańa býynǵa jetkizýdiń jarqyn úlgisin tanytyp keledi.
Aıta ketelik Ulttyq ulannyń erler hory elordalyq arýlarǵa merekelik kóńil-kúı syılaǵan edi.