Ulttyq ulan sarbazdary sý tasqyny bastalǵaly 2700 tonnadan asa júk túsirdi
ASTANA. KAZINFORM – Búginde Shyǵys Qazaqstan oblysynda Altaı aýdanyndaǵy sý tasqyny jaǵdaıy turaqtandy. Soltústik Qazaqstan oblysynyń Qyzyljar aýdanynda jáne Petropavl qalasyndaǵy jaǵdaı da osyǵan uqsas. Sonymen qatar Atyraý oblysynda áli kúnge deıin jaǵalaýdy nyǵaıtý jumystary júrgizilýde. Sý tasqynyna qarsy is-sharalarǵa QR ІІM Ulttyq ulanynyń áskerı qyzmetshileri belsendi qatysyp jatyr.
4 mamyrdaǵy jaǵdaı boıynsha Atyraý oblysynda 5546 (Atyraý q.) jáne 5451 (Qaraǵandy q.) áskerı bólimderinen 1 000-ǵa jýyq áskerı qyzmetshi jáne 30 tehnıka tasqynǵa qarsy is- sharalarǵa jumyldyrylǵan. Ulandyqtar polıtseılermen jáne qutqarýshylarmen birlesip ınertti materıaldary bar qapshyqtardy daıyndaý jáne jaǵalaýdy nyǵaıtý jumystaryn júrgizýdi jalǵastyrýda.
150-ge jýyq áskerı qyzmetshi Erkinqala, Rembaza shaǵyn aýdanynda sý tasqynyna qarsy is-sharalarǵa qatysýda. Onyń ishinde 20 sarbaz kelip túsken gýmanıtarlyq kómekti túsirýge jáne tıeýge tartyldy.
Sonymen qatar 400 qaraǵandylyq áskerı qyzmetshi Rakýsha jáne Besikti kentinde, Balyqshy, Kók Arna – Balyq zaýyty, Jańatalap shaǵyn aýdandarynda, Atyraý-Inder-Besikti tas jolynda, Sýarnasy-Ortalyq, FOK-da qapshyqtardy daıyndaýǵa jáne jaǵalaýdy nyǵaıtý jumystaryna atsalysyp jatyr. Qulsary qalasynyń aýmaǵynda qoǵamdyq tártipti saqtaýdy 5451 áskerı bóliminiń kúzetshileri qamtamasyz etýde. Áskerı qyzmetshiler osy iri eldi mekende eki aýysymda patrýldik-bekettik qyzmet atqarady.
Budan bólek, 5517 (Oral q.) jáne 6655 (Aqtóbe q.) áskerı bólimderiniń 250-den astam áskerı qyzmetshisi kúndiz-túni óz óńirlerindegi sý basqan aýmaqtarda patrýldik-bekettik qyzmet atqarady. 6697 (Qostanaı q.), 6637 áskerı bólimderiniń jáne QR Ulttyq ulany akademııasynyń 200-ge jýyq quqyqtyq tártip saqshylary óz óńirlerindegi Tobyl qalasy, Beskól aýyly, Teplıchnyı aýdany jáne Podgora shaǵyn aýdanynda qoǵamdyq tártipti qadaǵalaýdy jalǵastyryp júr.
Sý basqan óńirlerde sý tasqynyna qarsy is-sharalar bastalǵannan beri saldardyń aldyn alý jáne joıý úshin 3 000-nan astam ulandyq jumyldyryldy. Olar 120 avtomobıl tehnıkasy men 6 áýe kemesin paıdalandy. Sondaı-aq 1 781 adam evakýatsııalandy, uzyndyǵy 150 km-den astam jaǵalaýdy nyǵaıtý jumystary júrgizildi, 1 mıllıon 552 myń qap daıyndalyp, tóseldi, sý tasqyny oryndaryna 160 tonnadan astam gýmanıtarlyq júk jetkizildi jáne kúzetshiler 2 700 tonna kómekke jiberilgen júkterdi túsirdi.
