Ulttyq ulan sarbazdary sýıtsıd jasamaq bolǵan qyzdy qutqaryp qaldy

ASTANA. KAZINFORM - QR ІІM Ulttyq ulan sarbazdary sýıtsıd jasamaq bolǵan qyzdy qutqaryp qaldy, dep habarlaıdy Polisia.kz.

Qoǵamdyq tártip pen qaýipsizdikti qamtamasyz etý kezinde elordalyq ulandyqtar kópirden sekirgen qyzdy qutqardy. Qutqarý týraly beıneni kezdeısoq kýágerler túsirip alǵan.

Oqıǵa 2 qazan kúni keshki saǵat 22:00 shamasynda boldy. QR ІІM Ulttyq ulanynyń 5573 áskerı bóliminiń jasaǵyna qala turǵyny júgirip kelip kómek suraıdy. Onyń aıtýynsha, jas qyz kópirden Esil ózenine sekirip ketken.

Áskerı jasaq bastyǵy qatardaǵy jaýynger Narıman Myrzahmetov, patrýlshi sarbazdar Damır Muqashev jáne Davıd Korsýnovpen oqıǵa ornyna jedel jetip, birden qyzdy qutqara bastady.

– Qala kósheleriniń tynyshtyǵyn qadaǵalaý kezinde bizge beıtanys adam kelip, qyz balanyń sýǵa batyp bara jatqanyn aıtty. Biz dereý ony qutqarýǵa kiristik. Ratsııa arqyly osy oqıǵa týraly patrýldik top bastyǵyna habarladyq ta, boıjetkendi sýdan shyǵarýǵa tyrystyq. Ol jaǵaǵa jaqyn qashyqtyqta bolǵandyqtan, eńkeıip, onyń qolynan ustaı aldym, al áriptesterim ony jaǵaǵa shyǵarýǵa kómektesti. Sodan keıin biz qyzdy jyly kórpe, býshlatqa orap, jedel járdem kelgenge deıin oǵan alǵashqy medıtsınalyq kómek kórsettik. Kez kelgen ýaqytta kómek kórsetýge daıyn bolý — bul bizdiń mindetimiz, – dedi áskerı jasaq bastyǵy qatardaǵy Myrzahmetov.

Ulttyq ulan áskerı qyzmetshileriniń úılesimdi jáne kásibı is-qımyldary arqasynda adam ómiri aman qaldy. Sarbazdar óz qyzmetteriniń azamattardyń qaýipsizdigin qamtamasyz etýde sheshýshi ról atqaratynyn taǵy da dáleldedi.