Ulttyq ulan sarbazdary adasyp ketken pavlodarlyq balany taýyp, otbasyna tabystady

PAVLODAR. KAZINFORM - 5512 áskerı bóliminiń jasaǵy Pavlodar qalasy Soltústik polıtsııa bólimi aýdanynda adasyp ketken balany taýyp, otbasyna aman-esen tabystady.

Túni saǵat 22.45 shamasynda áskerı jasaq kóshelerdi patrýldeý kezinde 12 jastaǵy balany baıqap qalady. Jasóspirim óz úıin taba almaı, kóshede jalǵyz júrgen. 

- Balanyń Aımanov kóshesi boıyndaǵy kópqabatty úılerdiń birinde turatyny belgili boldy. Ol saǵat 18.00-de úıinen oınaýǵa shyǵyp, keıin adasyp ketken. Áskerı jasaq balanyń jaǵdaıyn anyqtap, №1 polıtsııa ýchaskesine jetkizdi. Tártip saqshylary onyń týystarymen baılanysqa shyǵyp, kóp ótpeı balany ákesine tapsyrdy, - dep habarlady «Shyǵys» óńirlik qolbasshylyǵynyń baspasóz qyzmetinen.

Óz kezeginde pavlodarlyq azamat ulyn aman-esen taýyp bergeni úshin 5512 áskerı bólimniń áskerı jasaǵy men polıtsııa qyzmetkerlerine alǵys bildirdi.

Eske sala keteıik, Pavlodarda Ulttyq ulannyń qarý-jaraǵy men áskerı tehnıkasy tekserildi.