Ulttyq ulan sarbazdary 101 jastaǵy ardagerdi quttyqtady
ASTANA. KAZINFORM — Astanada 101 jasqa tolǵan ardager turady. Uly jeńistiń 80 jyldyǵyna oraı Ulttyq Ulan sarbazdary Rzaǵul Baıkeshevtiń úıine arnaıy baryp, gúl shoqtaryn tabystady. Ekinshi dúnıejúzilik soǵys ardagerine arnaıy jeńis sherýin uıymdastyrdy.
Rzaǵul Baıkeshev Aqtóbe oblysynyń týmasy. Nebári 17 jasynda qan maıdanǵa attanyp, Kalının oblysynda, Rjev, Velıkıı Lýg qalalaryndaǵy shaıqastarda jaýǵa tegeýrindi qarsylyq kórsetip, Berlınge deıin barǵan. Polsha, Rýmynııa, Vengrııany azat etýge qatysqan. Ardager úsh aıdan soń 102 jasqa tolady. Búgingi kúni maıdangerdiń 2 uly, 5 nemeresi men 7 shóberesi bar. Ǵasyr jasasa da maıdanger áli tyń. Arnaıy quttyqtaı barǵan sarbazdarǵa aqjarma tilegin aıtyp, batasyn berdi.
- Jortqanda joldaryń bolsyn. Qydyr ata joldastaryń bolsyn. Árqashan aq jol bolyp, aman júrýdi jazsyn. Meniń bergen batam qabyl bolsyn. Óte rıza bolyp turmyn. Jyl saıyn bizdi umytpaı kelip turasyńdar. Razymyn, - degen tilegin bildirdi soǵys ardageri Rzaǵul Baıkeshev.
Ulttyq ulan sarbazdary ardagerlerge qurmet kórsetýdi dástúrge aınaldyrǵan. Bul joly Qurmet qaraýyl rotasy bastaǵan ulandyq sarbazdar ardager turatyn úıdiń aldynda áskerı sherý uıymdastyrdy. Áskerı ánderden shaǵyn kontsert qoıdy. Eski kúnderdi eske túsirgen qart maıdanger kózge jas aldy.
Budan bólek 5573 áskerı bóliminiń qatardaǵy jaýyngerleri de ystyq yqylastaryn bildirdi.
- Siz qatal synaqtardan óttińiz. Rýhanı qajyrly kúsh kórsettińiz jáne de jeńiske jettińiz. Uly Otan soǵysyndaǵy jeńis týraly estelik jáne de Sizdiń erligińiz úshin maqtanysh urpaqtan urpaqqa berile beredi. Biz úshin bolashaqqa ónegeli baǵyt-baǵdar retinde qyzmet atqarady,-deıdi qatardaǵy jaýynger Bekzat Jolanov.
Astana qalasyndaǵy 5573 áskerı bólimine bıyl 5 birdeı ardagerdi ulyqtaý mindeti júktelgen. Budan bólek, árbir óńirlik qolbasshylyq ókilderi de maıdangerlerdi marapattaıdy.
- Ulttyq ulannyń sarbazdary ardager efreıtor Baıgeshev Rzaǵul atamyzdy quttyqtaýǵa kelip otyrmyz. Bizdiń osy aqsaqaldar soǵysqa qatysyp, óziniń ómirin aıamaı, bizdiń jerimiz ben elimizdi agressorlarǵa bermeımiz dep osy kúnge jetkizdi. Olarǵa qurmet kórsetý, marapattaý, esimderin ulyqtaý - bizdiń perzenttik paryzymyz, -dedi 5573 áskerı bóliminiń komandıri Aıan Esjanov óz sózinde.
Aıta keteıik, Qazaqstanda 2025 jylǵy 20 qańtardaǵy jaǵdaı boıynsha 120 soǵys ardageri turady. Onyń 6-y Astana qalasynda. Bıyl Jeńistiń 80 jyldyǵyna oraı soǵys ardagerlerine tólenetin tólemaqy mólsheri 2,5 esege ulǵaıdy. Olardyń árqaısysyna 5 mıllıon teńgeden beriledi.
Osyǵan deıin 2025 jyly Uly Jeńiske 80 jyl tolatyny týraly habarlaǵan edik.
