Ulttyq ulan sapynda myńnan asa ıisshil ıt qyzmet etedi
ASTANA. KAZINFORM — QR ІІM Ulttyq ulanynda áskerı qyzmetshilermen qatar myńnan astam ıisshil ıt Otan qorǵaý shebinde abyroıly mindetti oryndap júr. Solardyń biri — Elza, ol ulandyqtarmen birge el qaýipsizdigi men quqyqtyq tártipti qamtamasyz etýge úles qosyp keledi.
Vedomstvonyń baspasóz qyzmeti málim etkendeı, Elza jarylǵysh zattardy izdeýge mamandanǵan. Ol Ulttyq ulan qatarynda 2019 jyldan beri qyzmet etedi jáne osy ýaqyt ishinde senimdi ári úzdik kómekshi retinde ózin dáleldedi. Astanada ótetin iri sporttyq jáne mádenı is-sharalar qarsańynda ol óz jetekshisimen birge aýmaqtardy tekserip, elorda turǵyndary men qonaqtarynyń qaýipsizdigin qamtamasyz etedi.
Onyń senimdi serigi — Astana qalasyndaǵy 5573 áskerı bóliminiń tájirıbeli kınologi, 17 jyldyq eńbek ótili bar serjant Bolat Áljanov. Soltústik Qazaqstan oblysynyń týmasy Elzany kúshik kezinen baptap ósirgen. Sol kezdiń ózinde-aq onyń belsendiligi men qabiletin baıqap, bolashaqta Otan qorǵaýǵa laıyq qyzmettik ıt bolatynyna senimdi boldy.
Elza — serjant Áljanovtyń úshinshi ıisshil ıti. Alǵashqy serigi — «Dakl» atty izdestirý ıti. Ol segiz jyldan astam qyzmet atqaryp, qurmetti demalysqa shyǵarylǵan. Ekinshi ıti Lakı esirtki zattaryn izdeýshi bolǵan. Búginde Elza osy estafetany laıyqty jalǵastyryp, qyzmette joǵary nátıjeler kórsetip keledi.
Qyzmettik mindetterdi oryndaýmen qatar, serjant Áljanov pen Elza birneshe ret quqyqtyq tártip áskerlerindegi básekelerde, vedomstvoaralyq jarystarda úzdik nátıjeler kórsetti. 2023 jyly Ulttyq ulannyń ıisshil ıtteri arasyndaǵy jarysta jeke esepte úshinshi oryn ıelense, 2025 jyly Petropavl qalasynda ótken saıysta birinshi orynǵa qol jetkizdi. Sondaı-aq Almatyda ótken kúshtik qurylymdar arasyndaǵy jarysta komandalyq esepte júldeger atandy.
— Jalpy, Ulttyq ulan bólimshelerinde patrýldik-izdestirý, esirtki izdeý, jarylǵysh zattardy anyqtaý jáne basqa da baǵyttar boıynsha ıisshil ıtter qyzmet etedi. Atap aıtqanda, 75 ıt jarylǵysh zattardy anyqtaýǵa, 89-y esirtki zattaryn izdeýge, al 703-i izdestirý baǵyty boıynsha mamandanǵan. Olardyń qyzmeti qaýipsizdikti qamtamasyz etý júıesiniń mańyzdy quramdas bóligi bolyp qala beredi, — delingen habarlamada.
Kınolog pen onyń tórt aıaqty seriginiń úılesimdi qyzmeti senimniń, kúndelikti jattyǵýdyń jáne ózara túsinistiktiń nátıjesi. Olar birge qyzmet atqaryp, azamattardyń qaýipsizdigin qamtamasyz etip keledi. Bul Otan qorǵaý jolynda áskerı qyzmetshilermen qatar qyzmettik ıtterdiń de mańyzdy ról atqaratynyn dáleldeıdi.
Osydan buryn Pavlodarda ıisshil ıtterdiń kómegimen 200-den astam qylmys ashylǵan.
