Ulttyq ulan ofıtserleriniń qatary 200-ge jýyq túlekpen tolyqty
ASTANA. KAZINFORM – Petropavl qalasyndaǵy ІІM Ulttyq ulany Akademııasy túlekteriniń 25-shi legine saltanatty túrde dıplom tabystaldy.
Bıyl áskerı joǵary oqý ornyn 200-ge jas ofıtser támamdady. Olardyń qatarynda úkimetaralyq kelisimder aıasynda bilim alǵan Tájikstan Respýblıkasynyń tórt azamaty da bar.
Saltanatty rásimge Ulttyq ulannyń basshylyq quramy, oqytýshylar, qonaqtar men túlekterdiń ata-analary qatysty.
Óz sózinde Іshki ister mınıstriniń orynbasary — Ulttyq ulannyń Bas qolbasshysy Ańsaǵan Baltabekov jas ofıtserlerge kásibı bilimmen qatar, antyna adal bolý, erlik pen tabandylyq tanytý — qyzmet jolyndaǵy basty talaptardyń biri ekenin atap ótti.
— Búgingi tańda Ulttyq ulanǵa úlken mindet, orasan zor jaýapkershilik artylyp otyr. Osy oraıda, sizder qıyn da kúrdeli áskerı qyzmetti adal ári jaýapkershilikpen atqarýǵa daıyn bolýlaryńyz qajet. Árbir ulandyq — eldiń tiregi, halyqtyń qorǵany. Sondyqtan batyl ári abyroıly bolyńdar, áskerı antqa adal bolyńdar, — dedi general-maıor Ańsaǵan Baltabekov.
Aıta keteıik, oqý úlgerimimen erekshelengen túlekter — Dıas Bedelbaı, Ádilet Shalqaruly, Azamat Zulqarnaev, Dýman Aıtkenov jáne Ámir Tóleýhanov ofıtserlik shenderin 4 maýsym — Memlekettik rámizder kúni Prezıdent — Qarýly Kúshteriniń joǵarǵy bas qolbasshysy Qasym-Jomart Toqaev pen Іshki ister mınıstri polıtsııa general-leıtenanty Erjan Sádenovtyń qolynan aldy.
Ulttyq ulannyń Akademııasy — elimizdegi irgeli áskerı oqý oryndarynyń biri. Munda kúshtik qurylymdarǵa qajetti kásibı mamandar oqytylady. Bilim berý úderisi 8 mamandyq boıynsha 10 kafedra negizinde júzege asyrylady.
Sondaı-aq, Akademııada Ulttyq ulan men basqa da kúshtik qurylymdardyń ofıtserleri men kelisimshart qyzmetkerlerine arnalǵan qaıta daıarlaý jáne biliktilikti arttyrý fakýlteti jumys isteıdi.
Bıyl memlekettik attestatsııalyq komıssııanyń sheshimimen 12 áskerı qyzmetshige magıstr dárejesi berildi. Olar alǵan bilimderin quqyqtyq tártip áskerleriniń basqarý jáne ǵylymı-taldaý baǵytynda tıimdi paıdalanady.
Shyǵarylym rásiminiń saltanatty bóligi áserli ofıtserlik valspen túıindeldi. Odan keıin qonaqtar Akademııanyń dástúrine saı taǵy bir erekshe oqıǵanyń kýási boldy. Jas leıtenant Aqnıet Dúısen sap alańynda súıiktisine úılený týraly usynys jasady. Bul romantıkalyq qadam barsha qatysýshylardyń ystyq yqylasy men qoshemetine ıe boldy.
Akademııa qurylǵan kúnnen bastap búginge deıin 4 myńnan astam kásibı ofıtser daıyndap, eldiń ulttyq qaýipsizdigin qamtamasyz etýge súbeli úles qosyp keledi.
Aıta ketelik Astanada «Ulttyq ulan — el aıbyny» patrıottyq muraly ashylǵan edi.