Ulttyq ulan ofıtseri sýǵa batyp bara jatqan balany qutqardy
ASTANA.KAZINFORM - Qazaqstan ІІM Ulttyq ulanynyń áskerı qyzmetshisi Balqash kóline batyp ketken balany qutqardy. Oqıǵa 15 shilde kúni saǵat 15:30 shamasynda Qaraǵandy oblysynyń Shubar túbek kentindegi ashyq jaǵajaıda bolǵan.
Belgili bolǵandaı, alǵash bolyp «Ortalyq» óńirlik qolbasshylyǵyna qarasty 5510 áskerı bóliminiń brondy tank qyzmetiniń bastyǵy maıor Dııar Jaqypov kómekke kelgen. Oqıǵa bolǵan kezde ofıtser eńbek demalysynda bolǵan jáne otbasymen birge kól jaǵasynda demalyp júrgen.
— Biz otbasymyzben jaǵajaıda demalyp jatqanbyz. Kenet: «Kómektesińder! Balamdy qutqaryńdarshy!» dep aıqaılaǵan áıel adamnyń sharasyz daýsyn estidim. Birden júgirip barsam, bir bala sýǵa batyp bara jatyr eken. Balanyń bóteni joq qoı. Oılanbastan sýǵa sekirdim de, jyldam júzip bardym. Adam ómirinen artyq qandaı qundylyq bar?! Sol kezdegi bar oıym ýaqyt joǵaltpaı balany qutqarý boldy. Shúkir, aman-esen jaǵaǵa shyǵaryp, anasyna tapsyrdym.– deıdi maıor Dııar Jaqypov.
Ofıtserdiń jedel jáne sheshýshi áreketteriniń arqasynda jamandyqtyń aldy alyndy. Qazir balanyń jaǵdaıy jaqsy, ómirine eshqandaı qaýip tónip turǵan joq.
Sýǵa túsý erejelerin saqtaý qaıǵyly jáıttardan aýlaq bolýǵa jáne adam ómirin saqtaýǵa kómektesetinin eskergen abzal.
Aıta keteıik, Semeı qalasynda Ertis ózenine eki bala batyp ketti. Oblystyq polıtsııa departamenti baspasóz qyzmetiniń málimetine súıensek, oqıǵa Nahalovka aýdanynda boldy.
