Ulttyq ulan mekemeler aýmaǵyn kúzetýdi tolyq baqylaýyna aldy
ASTANA. KAZINFORM – Іshki ister mınıstrliginiń Qylmystyq-atqarý júıesi komıtetiniń mekemelerin kúzetý jáne olardyń aýmaǵyna tyıym salynǵan zattardyń zańsyz engizilýine qarsy is-qımyl áskerı prokýratýra organdarynyń qadaǵalaý qyzmetiniń basym baǵyttarynyń biri sanalady. Engizilgen qadaǵalaý aktilerin qaraý qorytyndysy jáne Іshki ister mınıstrligi men Ulttyq ulan basshylyǵynyń qatysýymen ótken arnaıy alqa nátıjesinde atalǵan salada qadaǵalaý organynyń birqatar bastamasy iske asyryldy.
Qazaqstan Bas prokýratýrasy baspasóz qyzmetiniń málimetinshe, mekemelerdiń syrtqy perımetrin kúzetý tolyq kólemde Ulttyq ulannyń qaraýyna berildi. Bul vedomstvolar arasyndaǵy jaýapkershilik aımaqtaryn naqty aıqyndaýǵa jáne jumystyń tıimdiligin arttyrýǵa múmkindik berdi.
Kúzet is-sharalarynyń nátıjeliligi artty, ótkizý pýnktterinde azamattardy tekserýdiń jańa algorıtmderi ázirlenip, engizildi.
Ulttyq ulan qolbasshylyǵy mekemeler aýmaǵyna tyıym salynǵan zattardy alyp kirý áreketteriniń jolyn keskeni úshin áskerı qyzmetshilerdi materıaldyq yntalandyrýdy engizdi.
Qabyldanǵan sharalardyń nátıjesinde mekemeler aýmaǵynda olardy anyqtaý derekteri eki ese azaıdy.
Kúzet jabdyǵyn jańartý júrgizilýde: 90%-dan astam eskirgen júıeler Ulttyq ulan ázirlegen jáne buryn eki mekemede sátti synaqtan ótken jańa keshendermen almastyrylyp jatyr. Bul is-shara bıýdjettik qarajatty 4 mlrd teńgege deıin únemdeýge múmkindik beredi.
Mekemelerdi zamanaýı beınebaqylaý júıelerimen jabdyqtaý máselesi sheshilýde: 1,8 myńnan astam tsıfrlyq kamera satyp alyndy, olardyń ornatylýy 2026 jyldyń sońyna deıin aıaqtalmaq.
Áskerı prokýrorlardyń atalǵan baǵyttaǵy jumysy jalǵasady.
Buǵan deıin habarlaǵanymyzdaı, Ulttyq ulanda «BOOKGUARD» ádebı chellendji bastaldy.
