Ulttyq ulan qyzmetkerleri jumys ornynan anyqtamany endi onlaın ala alady
ASTANA. KAZINFORM – Jańa qyzmet túri eGov.kz portalynan alýǵa bolady.
Portaldyń habarlaýynsha, atalǵan tásil resmı qujatty birneshe mınýtta rásimdeýge múmkindik beredi. Bul sheshim qujat jaıyndaý úderisin aıtarlyqtaı jeńildetip, ýaqytty da únemdeıdi.
- Atalǵan qyzmet QR ІІM Ulttyq ulan qyzmetkerleri úshin ǵana qoljetimdi jáne ol tegin kórsetiledi. Ótinim bergen qyzmetkerdiń jumys isteıtin jeri rastalsa, anyqtama avtomatty túrde daıyndalyp, ony kóshirip alýǵa múmkindik týady, - delingen elektrondy úkimet habarlamasynda.
Ótinim bergen adam QR Ulttyq ulanda qyzmet etpeıtin bolyp shyqsa, júıe sebep-saldaryn túsindire otyryp, anyqtama berýden bas tartady. Qujat kúntizbelik 10 kúnge deıin kúshinde bolady.
Eske sala keteıik, bıylǵy jyldyń 26 mamyrynda Qazaqstanda «Qazaqstan Respýblıkasy azamattaryna pasporttar men jeke kýálikterdi berý» memlekettik qyzmetin onlaın formatta kórsetýge arnalǵan pılottyq joba iske qosyldy.
Osyǵan deıin qazaqstandyqtardyń jeke kýálikti qalaı onlaın ala alatyny týraly materıal jarııaladyq.