Ulttyq ulan qataryna 7 myńǵa jýyq adam shaqyrylady
ASTANA. KAZINFORM — QR ІІM Ulttyq ulanǵa kóktemgi áskerge shaqyrý naýqany bastaldy, dep habarlaıdy vedomstvonyń baspasóz qyzmeti.
Qazaqstan Respýblıkasy Іshki ister mınıstrliginiń Ulttyq ulanynda kóktemgi áskerge shaqyrý naýqany bastaldy. 2026 jylǵy 22 mamyr men 30 maýsym aralyǵynda quqyqtyq tártip áskeriniń qataryna shamamen 7 myń adamdy shaqyrý josparlanyp otyr.
Bul týraly QR ІІM Ulttyq ulany Bas qolbasshysynyń birinshi orynbasary — Bas shtab bastyǵy general-leıtenant Qaırat Aqtanovtyń tóraǵalyǵymen ótken kóktemgi áskerge shaqyrý naýqanyn uıymdastyrý jáne ótkizý máseleleri jónindegi vedomstvoaralyq keńeste málim boldy.
Qazir Ulttyq ulannyń shaqyrý jáne jasaqtaý bóliminiń ofıtserleri 17 oblys pen respýblıkalyq mańyzy bar 3 qalada jumys júrgizip jatyr.
Jas sarbazdardyń basym bóligi qoǵamdyq tártipti saqtaý, buqaralyq is-sharalardyń qaýipsizdigin qamtamasyz etý, sondaı-aq mańyzdy memlekettik nysandar men qylmystyq-atqarý júıesi mekemelerin kúzetý mindetterin atqaratyn áskerı bólimderge jiberiledi.
— Búginde Ulttyq ulan áskerı qyzmetshileri polıtsııa qyzmetkerlerimen birlesip, elimizdiń 21 qalasynda qoǵamdyq tártipti qamtamasyz etip otyr. Kún saıyn quqyqtyq tártipti saqtaý qyzmetine 7 myńnan astam ulandyq sarbaz jumyldyrylady, taǵy shamamen 2 myń áskerı qyzmetshi mańyzdy memlekettik nysandar men QAJ mekemelerin kúzetýde qyzmet atqarady, — delingen habarlamada.
2026 jyldyń basynan beri quqyqtyq tártip áskeri áskerı qyzmetshileri myńdaǵan quqyqbuzýshylyqtyń jolyn kesip, esirtki zattaryn zańsyz saqtaý faktilerin anyqtady, zańsyz aınalymnan shamamen 30 sýyq jáne atys qarýy tárkilendi. Sonymen qatar, ulandyqtardyń qyraǵylyǵy men jedel áreketteriniń arqasynda adasyp ketken balalar men joǵalǵan uıaly telefondar azamattarǵa qaıtaryldy.
Іshki qaýipsizdik pen turaqtylyqty qamtamasyz etýde Astana, Almaty jáne Túrkistan qalalaryndaǵy merzimdi qyzmet áskerı qyzmetshilerine erekshe ról júktelgen. Kún saıyn bólimshelerdiń jeke quramy qoǵamdyq tártipti kúzetýge, memlekettik, qoǵamdyq-saıası jáne mádenı-buqaralyq is-sharalar kezinde qaýipsizdikti qamtamasyz etýge tartylady.
QR ІІM Ulttyq ulanyndaǵy qyzmet jas qazaqstandyqtar úshin batyldyqtyń, tártiptiń jáne jaýapkershiliktiń mańyzdy mektebi bolyp qala beredi. Olar el azamattarynyń qaýipsizdigi men tynyshtyǵyn qamtamasyz etýge óz úlesin qosyp keledi.
Buǵan deıin Ulttyq ulan sapynda myńnan asa ıisshil ıt qyzmet etetinin jazǵanbyz.
