Petropavldaǵy sý tasqynyna qarsy jumystar: ulandyqtar 250 myń qum toly qap daıyndady

ASTANA. KAZINFORM – Soltústik Qazaqstan oblysynda kún raıynyń kúrt ózgerýi baıqalady, ekpindi jel kúsheıe tústi. Qyzyljar aýdany Teplıchnoe aýylynda salynǵan bógetterdi kúsheıtý úshin sý tasqyny saldaryn joıýǵa Ulttyq ulan Akademııasynyń kýrsanttary tartyldy.

– Olar tótenshe jaǵdaılar departamenti, polıtsııa qyzmeti jáne jergilikti atqarýshy bılik ókilderimen birge búginge deıin 250 myńnan asa qum salynǵan qap ázirledi. 800 kýrsant tórt aýysym boıynsha jumys istep jatyr. Áskerı qyzmetshilerge júıeli túrde tamaq pen demalys ýaqyty uıymdastyrylǵan, – dedi Ulttyq ulannyń resmı ókili Álibek Ábdilov.

Sarbazdar men kýrsanttardyń jaǵdaıyna qoǵam da beıjaı qaramaı, qoldan kelgen kómegin kórsetýde. Atap aıtqanda, «Ana júregi» sarbazdar analarynyń komıteti jaýyngerlerdiń jaǵdaıyn nazarda ustap, túrli qoldaý sharalaryn iske asyryp keledi.

– Bul – barlyǵymyzdyń ortaq mindetimiz. Balalarymyz kún demeı, tún demeı el úshin eńbek etip júr. Biz olarǵa tek tamaq emes, analyq meıirimimizdi de jetkizgimiz keledi. Múmkindiginshe sarbazdarǵa ystyq tamaq aparyp, hálderin surap turamyz. Bul iske turǵyndar da atsalysyp jatyr. Jastardyń aman bolýy – elimizdiń aman bolýy, – dedi «Ana júregi» sarbazdar analarynyń komıtetiniń múshesi Farıda Baýbekova.

Eske salsaq, Birikken Ulttar Uıymynyń Damý baǵdarlamasynyń Qazaqstandaǵy turaqty ókili Katarjına Vavernıa memleketter tasqyn sııaqty tabıǵı daǵdarystardy birlesip eńserý kerektigin aıtty.