Ulttyq ulan balalarǵa qaýipsiz shomylý erejelerin ánmen jetkizdi
ASTANA. KAZINFORM — QR ІІM Ulttyq ulanynyń áskerı qyzmetshileri shomylý maýsymy kezinde azamattardyń qaýipsizdik mádenıetin arttyrýǵa baǵyttalǵan anımatsııalyq beınerolık ázirledi. Joba zamanaýı jasandy ıntellekt tehnologııalarynyń kómegimen júzege asyryldy. Bul týraly áskerı vedomstvonyń baspasóz qyzmeti málim etti.
Beınerolıktiń ereksheligi — onyń basty keıipkerleri retinde Ulttyq ulannyń óńirlik qolbasshylyqtarynyń shevrondarynda beınelengen janýarlar tańdalǵan. Olar án arqyly kishkentaı kórermenge sý jaǵasyndaǵy qaýipsizdik erejelerin túsindirip, qarapaıym saqtyq sharalaryn saqtaýdyń mańyzyn jetkizedi.
Bastamanyń negizgi maqsaty — qazaqstandyqtardyń sý aıdyndaryndaǵy qaýipsizdik máselesine nazaryn aýdarý, jazataıym oqıǵalardyń aldyn alý jáne azamattardyń óz ómiri men aınalasyndaǵylardyń qaýipsizdigine jaýapkershilikpen qaraýyn qalyptastyrý.
Mýltfılm barysynda keıipkerler tek arnaıy jabdyqtalǵan jáne ruqsat etilgen oryndarda ǵana shomylý qajettigin eske salady. Sondaı-aq tekserilmegen aýmaqtarǵa sýǵa túspeý, balalardy qaraýsyz qaldyrmaý kerektigi túsindiriledi.
Osyndaı qarapaıym erejelerdi saqtaý tótenshe jaǵdaılardyń týyndaý qaýpin edáýir tómendetedi. Jasandy ıntellekt tehnologııalaryn qoldaný arqyly keń aýdıtorııaǵa, ásirese balalar men jastarǵa arnalǵan jarqyn ári este qalarlyq profılaktıkalyq kontent jasaldy.
— Anımatsııalyq format mańyzdy aqparatty jeńil qabyldaýǵa múmkindik berip, onyń tıimdiligin arttyra túsedi. Ulttyq ulanda profılaktıkalyq is-sharalardyń basty maqsaty — jazataıym oqıǵalardyń aldyn alý, qoǵamdyq tártip pen qaýipsizdik deńgeıin arttyrý, — delingen habarlamada.
Bul rette azamattardyń kópshilik demalys oryndarynda qaýipsiz júris-turys mádenıetin qalyptastyrýǵa erekshe kóńil bólinedi.
Ulandyqtar otandastardy óz qaýipsizdigine jáne jaqyndarynyń amandyǵyna jaýapkershilikpen qaraýǵa shaqyrady. Sý aıdyndaryndaǵy qarapaıym qaýipsizdik erejelerin saqtaý qaıǵyly jaǵdaılardyń aldyn alyp, adam ómirin saqtap qalýǵa múmkindik beredi.
Aıta keteıik, jaqynda Ulttyq ulan alǵash ret jasandy ıntellekt qoldanylǵan kontsert berdi.
