Ulttyq ulan avıatsııasynda ashyq esik kúni ótti
ASTANA. KAZINFORM — Búgin Astana qalasynyń áýeaılaǵynda ornalasqan Ulttyq ulan avıatsııalyq bazasynda Qazaqstan polıtsııasy kúnine oraı, QR Іshki ister mınıstrligi men Ulttyq ulanynyń uıymdastyrýymen BAQ ókilderine arnalǵan baspasóz-týry ótti.
Týr aıasynda BAQ ókilderine ekskýrsııa uıymdastyryldy. Atap aıtqanda, qonaqtarǵa avıabazanyń ınfraqurylymy, mádenı-demalys ortalyǵy, sport kesheni, 3656 áskerı bóliminiń shtaby men bazanyń ushý jáne ınjenerlik-tehnıkalyq quramyna arnalǵan ashana tanystyryldy.
Áýe eskadrılıa komandıriniń tárbıe jáne áleýmettik-quqyqtyq jumystar jónindegi orynbasary podpolkovnık Talǵat Býlanovtyń aıtýynsha, Ulttyq ulan avıabazasy tek quqyqtyq tártip áskerinde ǵana emes, elimizdegi zamanaýı ınfraqurylymy bar jańa áskerı nysan.
– Bıyl mamyr aıynyń basynda Qazaqstan Respýblıkasy Qarýly Kúshteriniń Joǵarǵy Bas Qolbasshysy – el Prezıdenti Qasym-Jomart Toqaev atalmysh avıabazany saltanatty túrde ashqan edi. Jáne de áskerı jaýyngerlik qyzmettiń uıymdastyrylýyna joǵary baǵa bergen bolatyn. Bizdiń ushqyshtar shetelge gýmanıtarlyq júkterdi tasydy. Sondaı-aq, elimizde bolǵan sý tasqyny zardaptaryn joıýǵa da ulandyq avıatsııa belsendi atsalysty. Halyqty qutqarý jumystaryna kómektesti. Qandaı jaǵdaı bolmasyn, ulandyq ushqyshtar jaýyngerlik tapsyrmany oryndaýǵa daıyn, - dedi podpolkovnık Talǵat Býlanov.
Óz kezeginde jýrnalıster qaýymy jańa áskerı ushaqtar men tikushaqtardy tamashalady. Áskerı tehnıkamen jaqynyraq tanysýǵa múmkindik aldy. Ásirese, BAQ ókilderi jeke quram men júkterdi tasymaldaýǵa, syrtqy aspada iri gabarıtti júkterdi tasymaldaýǵa, izdestirý-qutqarý operatsııalaryn júrgizýge, zardap shekkenderdi evakýatsııalaýǵa jáne t. b. arnalǵan túrli áýe kemelerin kóre aldy. Conymen qatar, áskerı kıim úlgilerinen jáne kólik túrlerinen kórme uıymdastyryldy. Ashanamen tanysý barysynda, as mázirinen dám tatty. Sondaı-aq, A-74 avtomaty men Makarov tapanshasyn shashyp-jınaýdan, normatıv tapsyrýdan baıqaýǵa qatysyp, ózara myqtyny anyqtady. Jeńimpazdar QR Іshki ister mınıstriniń orynbasary – Ulttyq ulan Bas qolbasshysy general-leıtenant Erkin Botaqanovtyń atynan gramotamen marapattaldy.
Іs-sharada sondaı-aq belgili rekordshy aýyr atlet Baýyrjan Kamalıev jalpy salmaǵy 32 tonna bolatyn áskerı ushaqty demonstratsııalyq túrde súırep, taǵy bir rekord ornatty.
– Bul rekordty QR Polıtsııa kúni merekesine arnaımyn. Ár azamat óz elin, óz jerin qorǵaýǵa daıyn bolýy kerek, - dedi jańa rekord ıesi.
40 jastaǵy ІІM-niń podpolkovnıgi ekstrımmen aınalysatyn aýyr atlet retinde tanymal. Ol sońǵy eki jylda tórt ret álemdik rekordty jańartqan.
Aıta keteıik, Ulttyq ulan avıatsııasy QR ІІM-niń kúshtik quramdas bóligi retinde kúshter men quraldardy qoldaný kezinde paıdalanylady jáne QR Qarýly Kúshteriniń, QR UQK Shekara qyzmetiniń avıatsııalyq quramalary men bólimderin biriktiretin jáne eldiń ulttyq qaýipsizdigin qamtamasyz etý júıesindegi neǵurlym joǵary tehnologııalyq, jaýyngerlik jáne utqyr quraldardyń biri retinde Qazaqstannyń memlekettik avıatsııasynyń quramyna kiredi.
Elordada Ulttyq ulannyń avıatsııalyq bazasyn ornalastyrý kúshter men quraldardy qoıylǵan mindetterdi oryndaý ornyna ýaqtyly jetkizýdi qamtamasyz etedi. Osylaısha, Ulttyq ulannyń bólimshelerine áýe barlaýyn júrgizý, aýadan qylmyskerlerdi izdeý, zardap shekkenderdi evakýatsııalaý boıynsha ushyp shyǵý jáne avıatsııalyq qoldaý kórsetý ýaqyty qysqartyldy.
