Ulttyq ulan áskerı qyzmetshisi Prezıdenttiń qolynan memlekettik nagrada aldy
ASTANA. KAZINFORM – Búgin Prezıdent Qasym-Jomart Toqaev Aqordada sý tasqynymen kúreske belsene atsalysqan azamattardy saltanatty túrde marapattady. Memlekettik nagrada alǵandar arasynda Ulttyq ulannyń áskerı qyzmetshisi de bar.
Memleket basshysy QR ІІM Ulttyq ulany 5517 áskerı bóliminiń jasaq bastyǵy efreıtor Asqap Nurbol Armanulyn qyzmettik jáne azamattyq mindetterdi oryndaý kezindegi janqııarlyq áreketi men tótenshe jaǵdaı kezinde kórsetken batyldyǵy úshin «Jaýyngerlik erligi úshin» medalimen marapattady.
Jasaq bastyǵy efreıtor Nurbol Asqap bıylǵy 21 sáýirde Oral qalasynyń Jaıyq ózeni aǵyp ótetin saıajaılarynyń birinde Polıtsııa departamentiniń qyzmetkerimen birge qoǵamdyq tártipti qamtamasyz etti. Sol kúni shamamen saǵat 10:30-da ulandyq áskerı qyzmetshilerdiń baqylaýyndaǵy aýmaqta ýaqytsha bóget jarylyp, mańaıdy sý shaıa bastady. Sondyqtan olar adamdardy qaýipsiz aımaqqa kóshirdi. Sol kezde alpys jastaǵy azamat sý qursaýynda qalǵan.
«Sýdyń aǵysyna tótep bere almaı kele jatqan adamdy kórip, birden kómekke umtyldyq. Meniń janymdaǵy polıtsııa qyzmetkeri jáne eriktiler bolyp, der kezinde egde jastaǵy adamdy jaǵaǵa alyp shyqtyq», - dedi sáýir aıyndaǵy oqıǵany eske alǵan Nurbol Asqap.
Onyń tabıǵı apat kezindegi batyl áreketi eskerýsiz qalǵan joq. Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev Ulttyq ulan áskerı qyzmetshisiniń keýdesine «Jaýyngerlik erligi úshin» medalin taqty. Marapat ıesin Іshki ister mınıstriniń orynbasary – Ulttyq ulannyń Bas qolbasshysy general-leıtenant Erkin Botaqanov Bas qolbasshylyqtyń jeke quramy aldynda quttyqtady.
«Ulttyq ulannyń barlyq áskerı qyzmetshileri kez kelgen sátte halyqtyń qasynan tabylýǵa ázir. Bizdiń jaýyngerler quqyqtyq tártipti saqtap qana qoımaı, adam ómirine arasha túsip jatatyn sátter jıi bolady. Efreıtor Nurbol Asqaptyń búgingi marapaty sonyń jarqyn kórinisi. Onyń batyl áreketi jas urpaqqa úlgi bolýǵa tıis», - dep atap ótti Ulttyq ulannyń Bas qolbasshysy.
Sondaı-aq general-leıtenant Erkin Botaqanov áskerı qyzmetshiniń sýreti Bas qolbasshylyq ǵımaratyndaǵy Qurmet taqtasyna ilinetinin jáne syıaqy taǵaıyndalatynyn aıtty. Sonymen qatar onyń aldaǵy qyzmetine tolaǵaı tabys tiledi.
«Búgin – men úshin mańyzdy kún. Alǵash ret Memleket basshysymen kezdesip, qolynan medal aldym. Bul – men úshin úlken mártebe. Qyzmetimdi elep-eskergeni úshin Prezıdent Qasym-Jomart Toqaevqa, Іshki ister mınıstri polıtsııa general-leıtenanty Erjan Sádenovke jáne Ulttyq ulan Bas qolbasshysy general-leıtenant Erkin Botaqanovqa alǵysym sheksiz. Aldaǵy ýaqytta da quqyqtyq tártip áskeri qatarynda adal qyzmetimdi jalǵastyra beremin», - dedi efreıtor Nurbol Asqap.
