Ulttyq ulan áskerı qyzmetshisi órtenip jatqan úıge kirip, eki balany qutqaryp qaldy
ASTANA. KAZINFORM – Oqıǵa Oralda, keshki ýaqytta, shamamen saǵat 21:00-de qaladaǵy kópqabatty turǵyn úılerdiń birinde boldy.
Osy ýaqytta QR ІІM Ulttyq ulany 5517 áskerı bóliminiń qatardaǵy jaýyngeri Armat Abylǵalıev úıinde bolǵan. Kireberisten kómek suraǵan daýystardy estı sala, ol dereý páterinen syrtqa shyqty.
Baspaldaq alańynda áskerı qyzmetshi qatty qorqyp turǵan balany kezdestirdi. Bala besinshi qabattaǵy páterlerdiń birinde órt shyǵyp, ishinde eki inisi qalyp qoıǵanyn aıtty.
Ýaqyt joǵaltpaı, ulandyq besinshi qabatqa kóterilgen. Qalyń tútinge qaramastan, ol páterge kirip, ishte qalǵan balalardy taýyp, olardy qaýipsiz jerge alyp shyqty. Balalardy qutqarǵannan keıin áskerı qyzmetshi bolǵan oqıǵa týraly Tótenshe jaǵdaılar departamentine habarlap, kórshilerden kómek surady.
Órt sóndirýshiler kelgenge deıin turǵyndar ottyń odan ári taralýyna jol bermeý úshin tıisti sharalar qabyldady. Oqıǵa ornyna jetken TJD qyzmetkerleri órt oshaǵyn aýyzdyqtady.
Ulttyq ulan áskerı qyzmetshisiniń jedel ári batyl áreketiniń arqasynda eki bala ajaldan aman qaldy.
Ulttyq ulan ofıtseri sýǵa batyp bara jatqan balany qutqarǵanyn jazǵan edik.
