Ulttyq ulan áskerı qyzmetshisi atys qarýynan jaraqat aldy
ALMATY. KAZINFORM — «Ońtústik» óńirlik qolbasshylyǵy habarlaýynsha, Ulttyq ulannyń bir áskerı qyzmetshisi atys qarýynan jaraqattandy.
Oqıǵa 2026 jylǵy 13 qańtarda saǵat 15:05 shamasynda bolǵan.
5571 áskerı bólimniń oqý polıgonynda josparly jattyǵý aıasynda atys ótkizilgen kezde 2-2025 shaqyrylymyndaǵy merzimdi áskerı qyzmetshi qatardaǵy G. qaýipsizdik erejesin buzyp, AK-74 atys qarýynan ózin-ózi jaraqattap aldy. Oq onyń sol jaq aıaǵynyń baltyryn jaralaǵan.
— Oqıǵa ornynda oǵan qajetti medıtsınalyq kómek kórsetilip, keıin shuǵyl túrde Qonaev qalalyq aýrýhanasyna jetkizildi. Áskerı qyzmetshiniń jaǵdaıy qanaǵattanarlyq, ómirlik mańyzdy aǵzalary zaqymdanbaǵan, — delingen habarlamada.
Oqıǵanyń sebepteri men mán-jaılary anyqtalyp, qyzmettik tekserý júrgizilip jatyr.
Eske salaıyq, buǵan deıin Shymkentte sarbazdyń qaıtys bolýyna qatysty qylmystyq is qozǵalǵanyn habarlaǵanbyz.