Ulttyq ulan áskerı qyzmetkeri halyqaralyq dron-jarysynda júldege ıe boldy
ASTANA. KAZINFORM — Elordadaǵy Astana IT University bazasynda ótken AITU KazRoboDrone 3.0 halyqaralyq jarysynda Ulttyq ulannyń áskerı qyzmetshisi Bekzat Jaıdarbekuly úshinshi oryn ıelendi. Bul týraly Polisia.kz habarlady.
Elordadaǵy Astana IT University bazasynda ótken AITU KazRoboDrone 3.0 halyqaralyq dron-reısıng jáne avıamodeldeý jarysyna QR ІІM Ulttyq ulanynyń «Burkit Team» sport komandasynyń áskerı qyzmetshisi qatysty.
Bedeldi dodaǵa elimizdiń ár óńiri men shet memleketterden 120-dan astam qatysýshy jınaldy. Ushqyshsyz ushý apparattary sanatynda 20 sportshy baq synap, arnaıy trassadan ótý jyldamdyǵyn, manevr jasaý dáldigin jáne ushý sheberligin kórsetti.
Fınaldyq kezeń qorytyndysy boıynsha ІІM Ulttyq ulanynyń «Burkit Team» sport komandasynyń áskerı qyzmetshisi Bekzat Jaıdarbekuly júldeli úshinshi oryndy ıelendi. Ol FPV-drondardy basqarýdaǵy joǵary kásibı daıyndyǵy men tehnıkalyq sheberligin dáleldep, komandanyń mereıin ústem etti.
Bul jetistik quqyqtyq tártip áskerlerin daıarlaý júıesinde ushqyshsyz tehnologııalardyń mańyzy artyp kele jatqanyn aıqyndaıdy. Sonymen qatar dron-reısıng pen avıamodeldeý salasynda qazaqstandyq mamandardyń áleýeti joǵary ekenin kórsetedi.
Aıta keteıik, buǵan deıin qazaqstandyq arnaıy jasaq halyqaralyq týrnırde top jarǵan edi.
Sondaı-aq Ulttyq ulanda jeti tilde erkin sóıleıtin polıglot sarbaz áskerı mindetin atqaryp júr.