Ulttyq ulan Akademııasynda kýrsanttarǵa dron basqarý úıretiledi
ASTANA. KAZINFORM — Bıyldan bastap quqyqtyq tártip áskerleriniń jaýyngerlik daıarlyq baǵdarlamasyna ushqyshsyz ushý apparattarynyń (UUA) operatorlaryn daıarlaý engizildi.
Bul Ulttyq ulan Akademııasynyń kýrsanttaryna zamanaýı tehnologııalardy meńgerip, qyzmettik-jaýyngerlik mindetterdi oryndaýǵa qajetti daǵdylardy ıgerýge múmkindik beredi.
Eske sala keteıik, jyl basynan beri Ulttyq ulannyń merzimdi áskerı qyzmetshilerin daıarlaý baǵdarlamasyna da ushqyshsyz ushý apparattaryn basqarýdy úıretý engizildi. Bul sarbazdarǵa áskerı qyzmet barysynda drondardy basqarý daǵdylaryn meńgerýge septigin tıgizedi.
Dron operatorlaryn daıyndyqtan ótkizý Qazaqstandaǵy áskerı reformanyń jańa josparyna da engizilgen.
Akademııa kýrsanttary alǵan bilimderin tájirıbede qoldanyp júr. Sonyń bir dáleli — FPV-drondardy basqarý boıynsha jarystardaǵy joǵary nátıjeleri. ️Máselen, Astanada kúshtik qurylymdar arasynda ótken FPV-drondardy basqarý jarysynda Ulttyq ulan Akademııasynyń kýrsanty Ismaıl Mýsın 14 komandanyń arasynan «Ushqyshsyz ushý apparatynan granata tastaý» jattyǵýynda úzdik nátıje kórsetip, birinshi oryn ıelendi.
— Ushqyshsyz ushý apparattaryn basqarý zeıindi, dáldikti jáne turaqty jattyǵýdy talap etedi. Mundaı sabaqtar bolashaq qyzmetimizge qajetti daǵdylardy qalyptastyrady. Akademııany bitirgennen keıin bilimimdi jeke qurammen jumys barysynda qoldanyp, sarbazdarǵa dron basqarýdy úıretip, óz tájirıbemmen bólisýdi josparlap otyrmyn, — dedi kýrsant Ismaıl Mýsın.
Zamanaýı tehnologııalardy meńgerý bolashaq ofıtserlerdiń kásibı daıarlyǵyn jetildirip, áskerı bólimderde jańa tásilderdi qoldanýyna jol ashady.
Buǵan deıin Ulttyq ulanda merzimdi qyzmet sarbazdary dron basqarýdy úırenip jatqanyn jazdyq.
