«Ulttyq tsıfrlyq mura» qorynyń quqyqtyq modelderi pysyqtalyp jatyr
ASTANA. KAZINFORM — «Ulttyq tsıfrlyq mura» qorynyń quqyqtyq modelderi pysyqtalyp jatyr. Bul týraly Mádenıet jáne aqparat mınıstrliginen málim etti.
— Memleket basshysynyń V Ulttyq quryltaı otyrysynda bergen tapsyrmasyna sáıkes, «Ulttyq tsıfrlyq mura» bastamasyn iske asyrý boıynsha tujyrymdamalyq jáne uıymdastyrýshylyq jumystar júrgizilýde. Qazirgi ýaqytta platformany qalyptastyrýdyń arhıtektýrasy, ıntegratsııalyq tetikteri jáne quqyqtyq modelderi pysyqtalýda. Platformany iske qosý merzimderi atalǵan jumystardyń nátıjesine, sondaı-aq qajetti tehnıkalyq jáne quqyqtyq rásimderdiń aıaqtalýyna qaraı aıqyndalatyn bolady, — dedi vedomstvodan agenttiktiń resmı saýalyna oraı.
Mınıstrlik málimetinshe, platforma qoldanystaǵy memlekettik jáne salalyq aqparattyq júıelermen, onyń ishinde e-Arhıv, e-Kitaphana, e-Museum júıelerimen, sondaı-aq memlekettik organdardyń, ǵylymı jáne bilim berý uıymdarynyń derekqorlarymen yqpaldastyrylady. Sonymen qatar «Asyl mura» memlekettik arhıvi bazasynda tıisti portal qurý múmkindigi de qarastyrylyp jatyr. Jasandy ıntellekt elementterin paıdalaný derekterdi óńdeý men júıeleý protsesterin avtomattandyrýǵa, izdeý jáne taldaý múmkindikterin keńeıtýge, sondaı-aq qazaq tilindegi tsıfrlyq kontenttiń sapasy men qoljetimdiligin arttyrýǵa múmkindik beredi. Bul rette zııatkerlik menshik quqyqtaryn qorǵaý, materıaldardy ruqsatsyz paıdalanýǵa jol bermeý jáne Qazaqstan Respýblıkasynyń derekter egemendigin qamtamasyz etý máselelerine erekshe nazar aýdarylady.
— Osylaısha, «Ulttyq tsıfrlyq mura» qory tarıhı jadyny saqtaýǵa, mádenı murany júıeleýge jáne ony azamattar, zertteýshiler men taldamalyq jáne jasandy ıntellekt sheshimderin ázirleýshiler úshin qoljetimdi etýge baǵyttalǵan strategııalyq joba sanalady. Aımaqtarda júrgiziletin tsıfrlandyrý jumystary ortalyq deńgeıde standarttar, ınfraqurylym jáne derekterdiń saqtalýy turǵysynan úılestirilip, ulttyq tsıfrlyq muranyń tutastyǵy men sapasyn qamtamasyz etýge negiz bolady, — dedi Mádenıet mınıstrliginen
Jyl basynda Qyzylorda qalasynda ótken Ulttyq quryltaıdyń V otyrysynda Memleket basshysy Qasym-Jomart Toqaev «Ulttyq tsıfrlyq mura» qoryn qurý ıdeıasyn qoldaǵan edi.
