Ulttyq testileý ortalyǵynyń úsh qyzmetkeri jaýapqa tartyldy
ASTANA. KAZINFORM - UQK Ulttyq testileý ortalyǵynyń qyzmetine zańsyz qol suǵý derekterin jarııalady.
«Qylmystyq kodekstiń 205-baby 2-bóligimen jáne 208-baby 2-bóligimen qarastyrylǵan qylmystardy jasaǵandary úshin kináli dep tanylǵan Qazaqstan azamattary — S, J jáne N-ǵa qatysty Qaraǵandy qalasy Qazybek bı aýdandyq soty men Óskemen qalasy № 2 sotynyń úkimderi zańdy kúshine endi.
Olardyń árqaısysyna 1 jyl bas bostandyǵyn shekteý jazasy belgilendi, sondaı-aq aqparattyq tehnologııa jáne telekommýnıkatsııa jelileri salasynda laýazymdy qyzmetke turý quqyqtarynan 3 jyl merzimge aıyryldy», — delingen habarlamada.
Sottalǵan azamattar 2023 jyly QR Ǵylym jáne joǵary bilim mınıstrligi Ulttyq testileý ortalyǵynyń zańmen qorǵalatyn aqparatyna zańsyz qol jetkizýdi jáne kóshirýdi júzege asyrǵandary úshin tergelgen.
Olardyń Ulttyq biryńǵaı testileýdiń, pedagogtar men magıstranttardyń bilimin baǵalaýdyń ótkizilýine qol suǵýlary dáleldendi.
