Ulttyq testileý ortalyǵynyń derekterin kóshirgeni úshin Oraldyń eki turǵyny sottaldy

ORAL. KAZINFORM - Ulttyq testileý ortalyǵynyń qyzmetine zańsyz aralasqan Oral qalasynyń eki turǵyny sottaldy. 

QR UQK baspasóz qyzmetiniń málimetinshe, Oral qalasy sotynyń úkimimen QR Qylmystyq kodeksiniń 206, 250 jáne 198-baptarynda kózdelgen qylmystardy jasaǵany úshin atalǵan eki azamattyń árqaısysy 2 jyl 6 aıǵa bas bostandyǵynan aıyrý jazasyna kesildi.

«Sondaı-aq olar kommertsııalyq uıymdarda 5 jyl merzimge basshylyq laýazymdardy atqarý quqyǵynan aıyryldy. Úkim shyǵarýǵa UQK-niń is júrgizý materıaldary negiz boldy. Anyqtalǵandaı, sottalýshylar 2021-2022 jyldary Qazaqstan Ǵylym jáne joǵary bilim mınıstrligi Ulttyq testileý ortalyǵynyń zańmen qorǵalatyn aqparatyna qol jetkizip, kóshirgen. Úkim zańdy kúshine endi», - dep habarlady vedomstvodan. 

Eske salsaq, buǵan deıin Oralda eki qabatty meıramhananyń shatyry órtengenin jazǵan edik.