Qazaqstanda jańa Qurylys kodeksi qabyldanyp, 1 shildeden bastap kúshine enedi – mınıstr
ASTANA. KAZINFORM – 2026 jyldyń 1 shildesinde jańa Qurylys kodeksi kúshine enedi. Onyń aıasynda 138 normatıvtik-quqyqtyq akti ózektendiriledi. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.
– Qurylys salasy tsıfrlyq tehnologııalardy engizý arqyly jobalaýdan bastap paıdalanýǵa berý jáne qaıta óńdeýdi qamtıtyn jańa deńgeıge ótýde. Osy jańalyqtardy bekitý jáne salany ári qaraı damytý úshin jańa Qurylys kodeksi qabyldanyp, bıyl 9 qańtarda qol qoıyldy. Ol 1 shildeden bastap kúshine enedi. Qurylys sapasy men qaýipsizdigin arttyrý úshin salaǵa qatysýshylarǵa qoıylatyn talaptar kúsheıtilip, lıtsenzııalardy elektrondy tekserý jáne ınjenerlerdi kezeń-kezeńimen sertıfıkattaý engiziledi, - dedi mınıstr.
Onyń aıtýynsha, qurylys normalaryn jetildirý úshin halyqaralyq standarttarǵa saı keletin Ulttyq tehnıkalyq normalaý ınstıtýty qurylady. Kodeksti iske asyrý aıasynda 138 normatıvtik-quqyqtyq aktini ózektendirý jumystary júrgizilip jatyr.
– Qala qurylysy qujattarynyń sapasyn kúsheıtý maqsatynda barlyq qurylys jobalary, onyń ishinde naqty jobalaý josparlary mindetti saraptamadan ótetin bolady. Atalǵan shara sapasyz jobalardy ýaqytyly anyqtaýǵa, jobalaý qateleri men jemqorlyqty boldyrmaýǵa jáne qujattardyń ashyqtyǵyn arttyrýǵa múmkindik beredi. Qosymsha kodekste naqty jobalaý josparlaryn tek eki jylda bir ret túzetýge ruqsat etildi. Bul qujattardyń turaqtylyǵyn qamtamasyz etýge baǵyttalǵan, - dedi Ersaıyn Naǵaspaev.
Eske salsaq, budan buryn Ulttyq tehnıkalyq ınstıtýt qurylys salasyndaǵy tehnıkalyq normatıvtik talaptardy ǵylymı zertteý, ázirleý, ózektendirý jáne súıemeldeý boıynsha biryńǵaı ortalyqqa aınalatynyn jazǵan edik.