Tazalyqqa ortaq talap kerek – Qoǵamdyq keńes tóraǵasy
ASTANA. KAZINFORM — Tazalyqqa qatysty qoǵamǵa da, memlekettik organdarǵa da, bızneske de túsinikti ortaq talaptar kerek. Mundaı pikirdi Ekologııa jáne tabıǵı resýrstar mınıstrligi Qoǵamdyq keńesiniń tóraǵasy Eldos Abaqanov bildirdi.
— Prezıdent «Taza Qazaqstannyń» máni tek aýmaqtardy tazalaý nemese aǵash otyrǵyzýmen shektelmeıtinin birneshe ret atap ótti. Negizgi maqsat — qoǵamda tazalyq mádenıetin, tabıǵatqa uqypty kózqarasty jáne azamattyq jaýapkershilikti qalyptastyrý. Búginde bastama jalpyulttyq sıpat aldy. 2025 jyldyń qorytyndysy boıynsha «Taza Qazaqstan» aıasyndaǵy ekologııalyq is-sharalarǵa 6,9 mıllıon adam qatysyp, 1,1 mıllıon gektardan astam aýmaq tazartyldy, 844 myń tonna qaldyq jınaldy. Bul — qoǵamnyń tazalyq máselesine beıjaı qaramaıtynyn kórsetetin mańyzdy kórsetkish, — dedi agenttik tilshisine bergen suhbatynda.
Onyń paıymynsha, endigi mindet — osy belsendilikti turaqty nátıjege aınaldyrý.
— Biz ótkizilgen senbilikter nemese otyrǵyzylǵan aǵashtar sanymen ǵana shektelmeýimiz kerek. Tazalanǵan aýmaq keıin de taza bolýy, al otyrǵyzylǵan aǵashqa kútim jasalyp, onyń jersinýi qamtamasyz etilýi qajet. Osy turǵydan alǵanda, Ulttyq tazalyq standartyn ázirleý — «Taza Qazaqstannyń» zańdy jalǵasy dep esepteımin. Sebebi tazalyqqa qatysty qoǵamǵa da, memlekettik organdarǵa da, bızneske de túsinikti ortaq talaptar kerek, — dedi Eldos Abaqanov.
Qoǵamdyq keńes tóraǵasynyń atap ótýinshe, standartta eldi mekenderdiń kósheleri, aýlalary, saıabaqtary, qoǵamdyq oryndary, jol jıekteri men basqa da aýmaqtardy kútip ustaýdyń negizgi talaptary belgilenýi tıis. Biraq eń bastysy — standart tek tazalaý jıiligin nemese qoqys shyǵarý tártibin belgileıtin qujat bolyp qalmaýy kerek. Ol túpki nátıjege baǵyttalýy qajet, ıaǵnı aýmaq qanshalyqty taza, abattandyrylǵan jáne turǵyndar úshin qolaıly bolýy shart.
— Sonymen birge elimizdiń barlyq óńirine birdeı talap qoıý kezinde olardyń erekshelikterin de eskergen jón. Negizgi talaptar respýblıka boıynsha ortaq bolýy múmkin, al naqty tetikter klımattyq jáne óńirlik jaǵdaılarǵa beıimdelýi kerek. Mysaly, soltústik óńirler úshin qardy ýaqytyly tazalaý men shyǵarý mańyzdy bolsa, ońtústik óńirlerde kógaldandyrý, sýarý jáne jasyl jelekti saqtaý máseleleri aldyńǵy qatarǵa shyǵady, — dedi ol.
Eldos Abaqanov taǵy bir mańyzdy másele retinde jaýapkershilikti atady. Onyń aıtýynsha, eger belgili bir aýmaq tazartylsa, onyń ári qaraıǵy jaǵdaıyna kim jaýap beretini túsinikti bolýy kerek. Aǵash otyrǵyzylsa, onyń sany ǵana emes, keıingi kútimi men jersinýi de nazarda bolýy qajet.
— Sonda biz bir rettik sharadan naqty nátıjege kóshemiz. «Taza Qazaqstannyń» turaqtylyǵy da osyǵan baılanysty. Bir jaǵynan, memleket qajetti jaǵdaı men ortaq talaptardy qalyptastyrady. Ekinshi jaǵynan, bıznes pen uıymdar óz aýmaǵyna jaýapkershilikpen qaraıdy. Al turǵyndar tazalyqty bireýdiń mindeti emes, óz ortasyna degen qalypty qarym-qatynas retinde qabyldaı bastaıdy. Sondyqtan búgingi mindet — «Taza Qazaqstan» aıasynda qalyptasqan qoǵamdyq belsendilikti joǵaltpaı, ony turaqty mádenıetke aınaldyrý. Ulttyq tazalyq standarty osy jumystyń naqty negizderiniń biri bola alady. Túpki maqsat — jyl saıyn qansha senbilik ótkizgenimizdi aıtý emes. Nátıje — qalalarymyz ben aýyldarymyzdyń turaqty taza bolýy jáne adamnyń ózi turatyn jerge degen kózqarasynyń ózgerýi. «Taza Qazaqstan» — sanaly tańdaý jáne ortaq is. Al tazalyq standarty osy ortaq jaýapkershilikti kúndelikti ómirde naqty iske aınaldyrýǵa múmkindik berýi tıis, — dedi qoǵamdyq keńes tóraǵasy.
Buǵan deıin ýtılalym men EcoQolday «Taza Qazaqstan» aktsııasyna qanshalyqty úles qosqanyn jazǵan edik.
