Ulttyq taýarlar katalogynda kıim-keshek pen kólik kósh bastap tur
ASTANA. KAZINFORM — 2026 jyldyń tamyzyndaǵy jaǵdaı boıynsha Qazaqstannyń Ulttyq taýarlar katalogynda (UTK) 29 mıllıonnan astam taýar tirkelgen.
Tirkelgen taýarlardyń eń úlken úlesin kıim-keshek pen kúndelikti tutyný taýarlary.
Ulttyq taýarlar katalogyndaǵy OKTRÝ sanattary boıynsha júrgizilgen taldaý nátıjesine sáıkes, kósh basynda – kıim-keshek pen kúndelikti tutyný taýarlary. Bul sanatta 8 mıllıonnan astam taýar tirkelgen, bul katalogtaǵy barlyq taýarlardyń eleýli bóligin quraıdy. Ekinshi orynda – kólik quraldary men kólik jabdyqtary. Bul sanatta 2 mıllıonnan astam taýar esepke alynǵan. Úshinshi orynda ınjenerlik júıelerge arnalǵan jabdyqtar men materıaldar ornalasqan, onda 1 mıllıonnan astam taýar tirkelgen.
Alǵashqy ondyqqa sondaı-aq qurylys buıymdary, jıhaz jáne ınterer taýarlary, azyq-túlik pen sýsyndar, qurylys materıaldary, zergerlik buıymdar, mashınalar men jabdyqtar, sondaı-aq baspa ónimderi endi.
Mundaı kórsetkishter Qazaqstannyń tutyný taýarlary naryǵynyń qurylymyn aıqyn kórsetedi. Sonymen qatar, bul Ulttyq taýarlar katalogynyń eń aldymen jappaı tutynylatyn taýarlardy óndirýshiler men ımporttaýshylar arasynda keńinen qoldanylatynyn dáleldeıdi. Sebebi dál osy segmentterde taýar aınalymy joǵary ári ónimniń qadaǵalanýyna qoıylatyn talap ta joǵary.
Ulttyq taýarlar katalogy – Qazaqstan Respýblıkasynda óndiriletin jáne elge ımporttalatyn barlyq taýarlar týraly málimetterdi qamtıtyn biryńǵaı memlekettik aqparattyq júıe. UTK-ny biryńǵaı memlekettik taýar anyqtamalyǵy retinde mindetti túrde paıdalaný 2025 jylǵy 18 shildedegi №215-VIII Qazaqstan Respýblıkasynyń Zańymen bekitilgen.
Katalogtaǵy árbir taýarǵa biregeı NTIN sáıkestendirý kody beriledi. Bul – 13 tańbadan turatyn nómir. Ol taýardyń búkil ómirlik tsıkli barysynda: óndiris kezinde, ımporttaý, saqtaý, ótkizý, elektrondyq shot-faktýralardy rásimdeý jáne baqylaý-kassa mashınalarynda paıdalanylady. NTIN kody tegin beriledi jáne merzimsiz jaramdy.
2026 jylǵy 1 shildeden bastap Ulttyq taýarlar katalogynyń talaptaryn engizýge arnalǵan ótpeli kezeń tolyq aıaqtaldy. Sońǵy kezeńde bul talaptar shaǵyn jáne mıkrokásipkerlik sýbektilerine, onyń ishinde úı mańyndaǵy dúkenderge de engizildi.
Qazirgi tańda saýda salasynyń barlyq qatysýshy – iri ımporttaýshylar men óndirýshilerden bastap shaǵyn saýda oryndaryna deıin – Ulttyq taýarlar katalogyn biryńǵaı taýar anyqtamalyǵy retinde paıdalanýǵa mindetti.
