Ulttyq taýarlar katalogyn engizý merzimi bekitildi
ASTANA. KAZINFORM – Qazaqstanda Taýarlardyń ulttyq katalogyn engizý kezeń-kezeńimen júzege asyrylatyn boldy. Bul týraly Saýda jáne ıntegratsııa mınıstrligi habarlady.
2025 jyldyń jeltoqsan aıy boıy Atameken Ulttyq kásipkerler palatasynyń alańynda Saýda jáne ıntegratsııa mınıstrligi, Qarjy mınıstrligi jáne Qazaqtelekom AQ ókilderiniń qatysýymen keńeıtilgen jumys kezdesýleri ótti. Jıyndarǵa bıznes qaýymdastyqtyń ókilderi qatysyp, taýarlardy tirkeý, POS-termınaldarmen jumys, aqparattyq júıelerdi ıntegratsııalaý jáne Ulttyq taýarlar katalogyn qoldanýǵa qatysty ózekti máseleler talqylandy.
Kezdesýler qorytyndysy boıynsha memlekettik organdar men bıznes ókilderi Ulttyq taýarlar katalogyn engizý máselesine kelisilgen tásil qalyptastyrdy. Osy nátıjede Saýda jáne ıntegratsııa mınıstrligi, Qarjy mınıstrligi jáne «Atameken» UKP arasynda Taýarlardyń ulttyq katalogyn kezeń-kezeńimen engizý týraly memorandýmǵa qol qoıyldy.
Qujatta Ulttyq taýarlar katalogynyń talaptaryn naryqtyń, memlekettik servıster men aqparattyq júıelerdiń daıyndyq deńgeıin eskere otyryp engizý kózdelgen. Atap aıtqanda, 2026 jylǵy 1 qańtardan bastap ákimshilik jaýapkershilik sharalaryn qoldanýǵa ýaqytsha moratorıı engiziledi. Bul kezeńde bıznes sýbektileriniń qyzmeti shektelmeıdi.
Mınıstrliktiń málimetinshe, atalǵan sheshim bıznes qaýymdastyq tarapynan aıtylǵan alańdaýshylyqty azaıtýǵa jáne Ulttyq taýarlar katalogynyń memlekettik derekqoryn tájirıbelik paıdalanýdy tolyq aıaqtaýǵa múmkindik beredi.
Sonymen qatar memorandýmda 2026 jyly Ulttyq taýarlar katalogynyń talaptaryn ártúrli naryq sýbektileri úshin kezeń-kezeńimen engizý tártibi belgilendi. Atap aıtqanda, ımporttaýshylar men otandyq taýar óndirýshiler úshin talaptar 2026 jylǵy 1 naýryzǵa deıin, saýda jelileri úshin – 2026 jylǵy 1 sáýirge deıin, al shaǵyn jáne mıkro kásipkerlik sýbektileri, onyń ishinde «úı janyndaǵy dúkender» úshin 2026 jylǵy 1 shildege deıin engiziledi.
Vedomstvo ókilderi mundaı tásil bıznes-protsesterdiń jańa talaptarǵa ýaqtyly beıimdelýine múmkindik beretinin jáne naryqtaǵy barlyq qatysýshylar úshin talaptardyń bir mezette iske qosylýynan týyndaıtyn táýekelderdi barynsha azaıtatynyn atap ótti.
Aıta keteıik, buǵan deıin osy jyldan bastap Ulttyq taýarlar katalogyn qoldaný mindetti bolatyny habarlanǵan.