Ulttyq taýarlar katalogy 26,5 mln taýardy biryńǵaı esepke biriktirdi
ASTANA. KAZINFORM – Qazaqstanda memlekettik satyp alý, kedendik ákimshilendirý, statıstıka, fıskaldyq chekter jáne elektrondyq shot-faktýralar júıelerinde taýarlardy biryńǵaı esepke alý úshin «Ulttyq taýarlar katalogy» engizilip jatyr. Bul týraly Qarjy vıtse-mınıstri Áset Turysov málimdedi.
Onyń sózinshe, qazir ártúrli salalarda taýarlarǵa qatysty birneshe bólek anyqtamalyq qoldanylady. Bul derekterdiń qaıtalanýyna, taýarlardyń ártúrli jiktelýine jáne esepke alý men taldaýdyń kúrdelenýine sebep bolyp otyr.
Osy máseleni sheshý úshin jasandy ıntellekt tehnologııalary negizinde «Ulttyq taýarlar katalogy» (UTK) memlekettik derekter bazasy ázirlendi.
Vıtse-mınıstrdiń aıtýynsha, katalog taýarlardy NTIN/GTIN kodtary arqyly biryńǵaı sáıkestendirýge múmkindik beredi. Sondaı-aq ol memlekettik organdar men bıznes úshin taýar derekteriniń etalondyq kózi bolyp sanalady. Qazirgi ýaqytta júıede shamamen 26,5 mıllıon taýar túrin qamtylǵan.
- Ulttyq taýarlar katalogy negizgi ekonomıkalyq baǵyttarǵa kezeń-kezeńimen engizilip jatyr. Júıe memlekettik satyp alý jáne josparlaý platformalarymen, kedendik deklaratsııalaý júıesimen, elektrondyq shot-faktýralarmen, marketpleıstermen, taýar esebin júrgizý júıelerimen, saýda jelilerimen jáne fıskaldyq derekter operatorlarymen ıntegratsııalanǵan, – dedi Áset Turysov.
Onyń aıtýynsha, bul sheshim taýarlardy birizdi sáıkestendirýge jaǵdaı jasaıdy. Nátıjesinde derekter sapasy artyp, elde taýar esebiniń biryńǵaı tsıfrlyq keńistigi qalyptasady.
Aıta keteıik, buǵan deıin salyq júıesindegi 14 aqparattyq platforma 5 negizgi júıege biriktirilgeni jaıly habarladyq.
