Ulttyq tasymaldaýshy balalardy poıyzda tasymaldaý erejelerin eske saldy

ASTANA. KAZINFORM - Jazǵy demalystyń bastalýymen birge balalarymen temirjol arqyly sapar shegetin jolaýshylardyń sany artady. Osyǵan baılanysty Ulttyq tasymaldaýshy balalardy poıyzben tasymaldaý tártibine erekshe nazar aýdarýǵa shaqyrady.

Ata-analar 7 jasqa deıingi bir balany jeke orynsyz tegin alyp júre alady. Eger balaǵa bólek oryn qajet bolsa, onda mindetti túrde balalar bıleti rásimdelýi tıis. Eger otbasyda 7 jasqa deıingi birneshe bala bolsa, árbir eresek jolaýshy tek bir balany ǵana tegin alyp júre alady, al basqa balalar úshin mindetti túrde balalar bıleti satyp alynady.

7 jastan 15 jasqa deıingi balalar poıyzda arnaıy balalar bıletimen ǵana saparlaı alady. Mundaı bılet eresekterge arnalǵan jolaqynyń 50%-yn quraıdy.

15 jastan asqan balalarǵa tolyq quny bar eresekter bıleti rásimdeledi. Olar poıyzda ózdiginen saparlaı alady, alaıda bul jaǵdaıda olardyń qolynda ata-anasynyń nemese zańdy ókiliniń notarıaldy rastalǵan jazbasha ruqsaty bolýy qajet.

Memleketaralyq baǵyttarda balalardy tasymaldaý kelesi tártippen júzege asyrylady: eger oryn berilmese, 5 jasqa deıingi balalar tegin saparlaı alady; 5 pen 10 jas aralyǵyndaǵy balalar úshin arnaıy balalar tarıfi qoldanylady; al 10 jastan 15 jasqa deıingi balalar Qazaqstan aýmaǵynda jolaqynyń 50%-yn tólese, shetel aýmaǵynda tolyq tarıfpen júredi.

Eger bala ata-anasymen birge sapar shegetin bolsa,bılet satyp alý jáne poıyzǵa otyrý kezinde balanyń týý týraly kýáligi nemese tólqujaty kórsetilý qajet. Eger balany zańdy ókili emes adam ertip júrse, onda eki ata-ananyń notarıaldy kýálandyrylǵan ruqsaty talap etiledi.

- Ulttyq tasymaldaýshy jolaýshylardy qaýipsizdik erejelerin muqııat saqtaýǵa jáne balalardyń únemi eresekterdiń qaraýynda bolýyn qatań túrde qadaǵalaýdy shaqyrady,-delingen «Jolaýshylar tasymaly» AQ baspasóz qyzmeti taratqan habarlamada.

Osyǵan deıin Oqý-aǵartý mınıstriniń oqýshylardy oqý jylynyń aıaqtalýymen quttyqtaǵany týraly jazdyq.