Ulttyq tabıǵı parkterdegi týrıstik qyzmetke qatysty ereje jańardy
ASTANA. KAZINFORM — Ekologııa jáne tabıǵı resýrstar mınıstriniń 2025 jylǵy 22 shildedegi buıryǵymen Memlekettik ulttyq tabıǵı parkterde týrıstik jáne rekreatsııalyq qyzmetti júzege asyrý qaǵıdalaryna ózgeris engizildi.
— Ulttyq parkterde týrıstik jáne rekreatsııalyq qyzmet ákimshilik-sharýashylyq maqsattaǵy obektilerdi ornalastyrý, Ulttyq parktiń qorǵalýyn jáne jumys isteýin qamtamasyz etý úshin qajetti sharýashylyq qyzmet júrgizý, áýesqoılyq (sporttyq) balyq aýlaýdy, janýarlar dúnıesin jalpy paıdalanýdy uıymdastyrýdy qosa alǵanda, kelýshilerge qyzmet kórsetý, rekreatsııalyq ortalyqtar, jabaıy janýarlardy ósirýge jáne kútip-baǵýǵa arnalǵan volerler, balyq ósirý sharýashylyǵy, qonaqúıler, kempıngter, mýzeıler men týrısterge qyzmet kórsetýdiń basqa da obektilerin salýdy jáne paıdalanýdy júzege asyrý, týrıstik, rekreatsııalyq jáne shekteýli sharýashylyq qyzmet aımaqtarynda rekreatsııalyq júktemelerdiń normalaryn eskere otyryp, dem alý alańqaılary men tamashalaý alańdaryn, jaǵajaılardy, qaıyq stantsııalaryn, sýda júzetin kólik túrleri men jaǵajaı qural-jabdyǵyn jalǵa berý pýnktterin ornatý jolymen júzege asyrylady, — delingen qujatta.
Balyq sharýashylyqtaryn ornalastyrý úshin ýchaskeler berý memlekettik ekologııalyq saraptamanyń oń qorytyndysy bar bıologııalyq negizdeme bolǵan kezde júzege asyrylady. Balyq sharýashylyǵyn júrgizý sýmen qamtamasyz etýdiń tuıyq tsıklimen balyq ósirý sharýashylyqtaryn uıymdastyrý tásilimen júzege asyrylady.
Ulttyq parkterdegi týrıstik jáne rekreatsııalyq qyzmetti tikeleı Ulttyq park, sondaı-aq týrıstik qyzmetter kórsetetin jeke jáne zańdy tulǵalar júzege asyrady.
Týrıstik jáne rekreatsııalyq qyzmetti júzege asyrý úshin ýchaskeler memlekettik ulttyq tabıǵı parktiń ınfraqurylymyn damytýdyń bas josparyna sáıkes jáne qazirgi ınfraqurylymymen de, jańa ınfraqurylym qurý úshin de týrıstik, rekreatsııalyq (ýaqytsha qurylystar ǵana salý úshin) jáne shekteýli sharýashylyq qyzmet aımaqtarynda ǵana beriledi.
Aýmaǵynda avtokólik quraldaryna arnalǵan joldar men turaqtar, týrıstik marshrýttar ornalasqan Ulttyq parkter ýchaskeleri paıdalanýǵa berilmeıdi.
Týrıstik jáne rekreatsııalyq qyzmetti júzege asyrý úshin Ulttyq parkter erekshe qorǵalatyn tabıǵı aýmaqtar salasyndaǵy ýákiletti organnyń jáne Ulttyq parktiń resmı ınternet-resýrstarynda Ulttyq parkterdiń týrıstik áleýeti týraly aqparat ornalastyrady.
Sonymen qatar, bıvak aıaldamalary men tamashalaý alańdaryn uıymdastyrý jáne olardyń qurylǵylaryn paıdalaný úshin jeke ári zańdy tulǵalar Ulttyq parktiń ýchaskesin qysqa merzimdi paıdalaný shartyn jasasady.
Ulttyq parkterdiń aýmaǵynda obektilerdi ornalastyrýǵa arnalǵan ýchaskeler týraly áleýetti ınvestorlardy habardar etý úshin Ýákiletti organ men Ulttyq parktiń resmı ınternet-resýrsynda Bas jospardyń úzindi kóshirmesi ornalastyrylady.
Atap aıtqanda, ulttyq parkterdiń ýchaskeleri týrıstik jáne rekreatsııalyq qyzmetti júzege asyrý úshin bes jyldan jıyrma bes jylǵa deıingi ýaqytqa uzaq merzimdi paıdalanýǵa beriledi.
Budan buryn habarlanǵandaı, byltyr Qazaqstandaǵy ulttyq parkterge 2,8 mıllıonnan astam adam barǵan. 2023 jylǵy derekpen salystyrǵanda 18%-ǵa kóp.