Ulttyq sý resýrstary aqparattyq júıesi ázirlenip jatyr

ASTANA. KAZINFORM – Ulttyq sý resýrstary aqparattyq júıesi sý nysandary týraly derekterdi biriktiredi. Bul týraly Sý resýrstary jáne ırrıgatsııa mınıstri Nurjan Nurjigitov málim etti.

- Jyl basynan beri bizdiń mınıstrlik Eýrazııa damý bankiniń tsıfrlyq bastamalar qorynyń granty esebinen ulttyq sý resýrstary aqparattyq júıesin ázirlep jatyr. Atalǵan platforma birtutas tsıfrlyq orta retinde jumys isteıdi jáne sý nysandary týraly derekterdi biriktiredi. Ol degenimiz spýtnıktik monıtorıng, datchıkter men eseptegish quraldar, gıdroposttar, jedel eseptilik jáne salalyq statıstıka. Sonymen qatar sýarmaly jeliler men sý resýrstaryn esepke alýdy avtomattandyrý baǵytynda jumys júrgizilip jatyr, - dedi Nurjan Nurjigitov Úkimet otyrysynda.

Mınıstr keltirgen málimetke súıensek, búginde 3,5 myń shaqyrymnan astam sýarý ınfraqurylymyn jańǵyrtý jáne tsıfrlandyrý maqsatynda kanaldar kezeń-kezeńimen avtomattandyrylyp jatyr.

- Atap aıtqanda, bıyl Qyzylorda oblysynda 58 gıdrobeketti avtomatty sý esepteý quraldarymen jabdyqtalyp jatyr. Sonymen qatar Túrkistan, Jambyl, Qyzylorda, Almaty jáne Jetisý oblysynda jalpy uzyndyǵy 5 myń shaqyrymnan astam sýarý jelilerin tsıfrlandyrýǵa arnalǵan jobalyq-smetalyq qujattama ázirlenip jatyr, - deıdi ol.

Búgin Úkimet otyrysynda sý sharýashylyǵyna qatysty máseleler talqylanyp jatyr.