Ulttyq statıstıka bıýrosy Rosstatpen úsh baǵyt boıynsha tájirıbe almasty
ASTANA. KAZINFORM — QR SJRA Ulttyq statıstıka bıýrosy Reseı Federatsııasynyń Federaldyq memlekettik statıstıka qyzmetiniń (Rosstat) beıindi basqarmalarynyń basshylary bastaǵan delegatsııasyn qabyldady.
Vedomstvonyń baspasóz qyzmetiniń málimetinshe, eki kúndik jumys sapary 2025-2026 jyldarǵa arnalǵan yntymaqtastyqty damytý jónindegi Jol kartasy aıasynda ótti.
Kezdesýler barysynda kadrlyq áleýet pen korporatıvtik mádenıetti damytý, resmı statıstıkany tanymal etý jáne statıstıkalyq saýattylyqty arttyrý, sondaı-aq statıstıkalyq derekterdiń sapasyn qamtamasyz etý tásilderin jetildirý máselelerine basa nazar aýdaryldy.
Jumys kezdesýin asha otyryp, Ulttyq statıstıka bıýrosy basshysynyń orynbasary Farhat Qalıev eki statıstıka vedomstvosy arasyndaǵy kásibı ózara is-qımyldy odan ári damytýdyń mańyzdylyǵyn atap ótti.
— Biz statıstıka vedomstvolary arasynda qalyptasqan kásibı dıalogty, tájirıbe almasýǵa degen ashyqtyqty jáne praktıkalyq sheshimdermen bólisýge daıyndyqty joǵary baǵalaımyz. Mundaı kezdesýler tek bilim men ozyq tájirıbeler almasýǵa ǵana emes, sondaı-aq ujymdarymyz arasyndaǵy kásibı baılanystardy nyǵaıtýǵa múmkindik beredi, — dedi Farhat Qalıev.
Sapar aıasyndaǵy jumys úsh negizgi baǵyt boıynsha júrgizildi.
Birinshi baǵyt kadrlyq áleýet pen korporatıvtik mádenıetti damytýǵa arnalǵan. Taraptar kásibı quzyretterdi damytý, tıimdi komandalardy qalyptastyrý jáne qyzmetkerlerdiń kásibı ósýine qatysty tásilderdi talqylady.
Ekinshi baǵyt — resmı statıstıkany qoǵamǵa keńinen tanystyrý jáne halyqtyń statıstıkalyq saýattylyǵyn arttyrý. Kezdesý barysynda derekterdi paıdalanýshylarmen baılanys ornatý, aqparatty tıimdi jetkizý jáne statıstıkalyq málimetterdi taratý baǵytyndaǵy tájirıbeler talqylandy.
Úshinshi ári negizgi baǵyt resmı statıstıkalyq derekterdiń sapasyn qamtamasyz etýge arnalǵan. Taraptar sapany basqarý tásilderin qarastyryp, tıisti protsesterdi jetildirý boıynsha praktıkalyq sheshimdermen almasty.
Bıýro men Rosstat arasyndaǵy yntymaqtastyq júıeli sıpatqa ıe. Jol kartasyn iske asyrý sheńberinde eki vedomstvonyń mamandary eńbekaqy statıstıkasy, aýyl sharýashylyǵy sanaǵyn ótkizý, qurylystaǵy baǵa ındeksin qalyptastyrý, halyqtyń turmys deńgeıi kórsetkishteri jáne basqa da baǵyttar boıynsha birqatar onlaın-konsýltatsııa men jumys kezdesýlerin ótkizdi.
Kezdesý qorytyndysy boıynsha taraptar aldaǵy eki jylǵa arnalǵan birlesken is-qımyl josparyn naqtylap, resmı statıstıka salasyndaǵy ádisnamalyq tásilder men praktıkalyq sheshimder boıynsha tájirıbe almasýdy jalǵastyrýdy josparlap otyr.
Osydan buryn Ulttyq statıstıka bıýrosy JI negizindegi analıtıkalyq chat-botty iske qosqanyn jazǵanbyz.
