Otandyq tas óńdeý salasynda suranystyń 90%-dan astamy qamtamasyz etilgen – Saýda mınıstrligi
ASTANA. KAZINFORM - Standarttaý jáne tehnıkalyq retteý quraldaryn kezeń-kezeńimen engizýdiń arqasynda Qazaqstannyń tas óńdeý salasynyń júıeli damyp keledi, dep habarlaıdy QR Saýda jáne ıntegratsııa mınıstrliginiń baspasóz qyzmeti.
Baspasóz qyzmetiniń málimetterine qaraǵanda, negizgi kezeńderdiń biri – ST RK 3619 «Tabıǵı tastan jasalǵan buıymdar. Jalpy tehnıkalyq sharttar» ulttyq standartynyń qabyldanýy boldy. Bul standart salalyq qaýymdastyqtyń, onyń ishinde «QAZAQ STONE» Qazaqstan tas óńdeý salasy odaǵy ZTB-nyń belsendi qatysýymen ázirlendi.
Standart tabıǵı tastan jasalǵan buıymdardyń sapasy men qaýipsizdigine biryńǵaı talaptardy belgiledi, sondaı-aq ónimdi ken oryndarynyń shıkizat bazasymen salystyrýdy qosa alǵanda, sáıkestikti rastaý rásimderin bekitti.
Tehnıkalyq retteýdi odan ári damytý standart talaptaryn «Ǵımarattar men qurylystardyń, qurylys materıaldary men buıymdarynyń qaýipsizdigi týraly» Qazaqstan Respýblıkasynyń tehnıkalyq reglamentine (2023 jylǵy 9 maýsymdaǵy № 435 buıryq) engizý arqyly qamtamasyz etildi. Bul standart erejelerin mindetti deńgeıde bekitýge múmkindik berip, búkil el boıynsha talaptardyń birkelki saqtalýyn qamtamasyz etti. Nátıjesinde naryq anaǵurlym ashyq ári túsinikti boldy, sáıkestikti baǵalaý júıesine degen senim artty jáne ónim sapasy jaqsardy.
Resmı statıstıka derekterine sáıkes, tabıǵı tastan jasalǵan kespekshe (brýschatka), bordıýr tastary jáne tósem plıtalaryn otandyq óndirý ishki naryq qajettiliginiń 91%-yna deıin qamtamasyz etedi. Sonymen qatar, qabyldanǵan sharalar óndiris qýatynyń júktemesin edáýir arttyryp, ónim shyǵarý kólemin ulǵaıtýǵa múmkindik berdi. Atap aıtqanda, 2025 jyldyń qorytyndysy boıynsha granıt bordıýri men tósem plıtalaryn óndirý 30%-ǵa ósti.
-Bizdiń sala tabıǵı tastan jasalǵan buıymdardy óndirý men óńdeýdi qamtıdy jáne qazirgi ýaqytta qarqyndy damyp keledi. Ulttyq standartty engizýdiń arqasynda, ásirese granıt bordıýrleri men brýschatka óndirisi ulǵaıyp, ımporttan is júzinde tolyq bas tartýǵa múmkindik týdy. Sondaı-aq standarttardy ázirleý naryqtan sapasyz qurylys materıaldaryn shyǵarýǵa yqpal etti. Tehnıkalyq retteý – otandyq óndirýshilerdi damytýdyń negizgi quraly, – dep atap ótti Qazaqstan tas óńdeý salasy odaǵy basqarma tóraǵasy Daýren Aǵzymov.
Otandyq ónimder ulttyq jáne halyqaralyq talaptarǵa sáıkes keledi, bul salanyń eksporttyq múmkindikterin keńeıtedi. Qazaqstanda óndirilgen tabıǵı tas buıymdary iri ınfraqurylymdyq jobalarda qoldanylyp, shetelge eksporttalyp jatyr.
Osyǵan deıin Qazaqstanda tsıfrlyq qaýipsizdikti kúsheıtetin jańa ulttyq standarttar bekitilgeni týraly jazdyq.
