Ulttyq sportymyz qashan Olımpıada baǵdarlamasyna enedi
ASTANA. KAZINFORM — Bıyldan bastap ulttyq sport túrlerine basymdyq beriledi. Maýsym aıynda kúshine engen «Dene shynyqtyrý jáne sport týraly» zańnyń jańa redaktsııasynda ulttyq sport túrleri olımpıadalyq jáne paralımpıadalyq sport túrlerimen bir deńgeıde basym baǵyttar qataryna engizildi.
— Bıyldan bastap ulttyq sport túrleri basym sport túrleriniń qataryna engizildi. Kelesi jyldan bastap olarǵa jeke bıýdjet bólinedi, oqý-jattyǵý jıyndary uıymdastyrylady. Sondaı-aq ǵylymı-medıtsınalyq turǵydan qoldaý kórsetiledi. Jańa zań aıasynda sportshylarǵa beriletin syıaqylar men áleýmettik qoldaý qaıta bekitiledi. Osy ýaqytqa deıin ulttyq sport qaýymdastyq deńgeıinde ǵana damysa, endi árqaısysy derbes federatsııa bolyp qurylady. Bul olarǵa óz bıýdjetin basqarýǵa múmkindik beredi. Sonymen qatar ulttyq sport boıynsha bapkerler daıyndaıtyn jańa ýnıversıtet salynyp jatyr. Onyń basty maqsaty — kásibı mamandar men menedjerlerdi daıarlaý, — deıdi Týrızm jáne sport mınıstrligi sport jáne dene shynyqtyrý isteri komıtetiniń resmı ókili Jibek Joly arnasynyń «Búgin LIVE» baǵdarlamasyna bergen suhbatynda.
Maman ulttyq sportpen aınalysatyndardyń basym bóligi aýyldyq jerde turatynyn aıtady.
— Qazir elimizde 8 mıllıonnan astam adam sportpen aınalysady, sonyń 700 myńy ulttyq sport túrlerin tańdaıdy. Ártúrli aımaqta 1500-ge jýyq bapker jumys isteıdi, olardyń myńnan astamy aýyldyq jerde, — deıdi Meıramǵazy Saparǵalıev.
Komıtet ókili ulttyq sportymyzdy Olımpıadaǵa engizý úshin qandaı talaptar qoıylatynyn túsindirdi.
— Ulttyq sport túrlerin Olımpıada baǵdarlamasyna engizý úshin eń aldymen Halyqaralyq olımpıada komıtetiniń maquldaýy qajet. Sonymen qatar ol sport túri halyqaralyq deńgeıde damyp, buqaralyq sıpat alýy tıis. Bul birden júzege asa salatyn protsess emes, oǵan kóp jyldar men júıeli jumys kerek. Eń aldymen ulttyq sport túrlerin Azııa oıyndarynyń baǵdarlamasyna engizý mańyzdy. Eger álemdik deńgeıde qyzyǵýshylyq artsa, ony qoldaýǵa daıynbyz, — deıdi ol.
Meıramǵazy Saparǵalıev qaı sport túrleri Olımpıada baǵdarlamasyna ene alatynyn da atady.
— Intellektýaldy oıyndardyń ishinde toǵyzqumalaq, al jekpe-jek túrlerinen qazaq kúresi eń joǵary áleýetke ıe. Sondaı-aq at sporty túrlerine de qyzyǵýshylyq bar, — deıdi maman.
Aıta keteıik, Anglııanyń Lıverpýl qalasynda World Boxing aıasynda ótip jatqan álem chempıonatynda Natalıa Bogdanova altyn medal aldy.