Ulttyq sport týraly zań kerek – depýtat
ASTANA. KAZINFORM – Ulttyq sport týraly zań kerek. Mundaı usynysty Májilis depýtaty Qazybek Álishev jasady.
Búgin Májilistiń Áleýmettik-mádenı damý komıtetinde «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý, sondaı-aq normalardy shekten tys (shekten tys) zańnamalyq retteýdi alyp tastaý týraly» zań jobasy talqylandy. Іs-shara barysynda Qazybek Álishev deptýttarǵa zań jobasyn tanystyrǵan Týrızm jáne sport vıtse-mınıstri Serik Jarasbaevtan ulttyq sport túrlerin damytý úshin ne istelinetinin surady.
«Ulttyq sport ulttyq ıdeologııamyzdy, qundylyǵymyzdy dáripteıdi. Osy oraıda mınıstrlik ustanymy qandaı? Menińshe, elimizge arnaıy Ulttyq sport týraly zań kerek. Mundaı zań Qyrǵyz Respýblıkasynda, sondaı-aq Reseı quramyna kiretin Tyva elinde bar. Elimizde de ulttyq sportty qoldaıtyn osyndaı zań qabyldaýǵa ne kedergi?» - dedi Májilis deptýtaty.
Saýalǵa jaýap bergen vıtse-mınıstr ulttyq sport túrlerin damytý úshin arnaıy zań kerek bolýy múmkin ekendigin joqqa shyǵarmady.
«Biraq qazirgi ýaqytta 2029 jylǵa deıingi sportty damytý tujyrymdamasy bekitilgen. Onda ulttyq sportty qoldaýdyń birqatar qaǵıdasy kórsetilgen. Munan bólek, bıyl qyrkúıektiń 8-15 kúnderi Dúnıejúzilik kóshpendiler oıyndaryn ótkizemiz. Ol da ulttyq sport túrlerin qamytýǵa úlken áserin tıgizedi dep senemiz. Sebebi ol kezde resmı túrde 20 sport túrinen jarys ótedi. 10 kórsetilim sporty ótedi. 100-den astam elden sportshy qatysady», - dedi Serik Jarasbaev.
