Ulttyq sport mádenı muranyń mańyzdy bóligi ári birlesken jobalar úshin perspektıvaly baǵyt - Sport mınıstri
ASTANA. KAZINFORM – Bul týraly Týrızm jáne sport mınıstri Erbol Myrzabosynov Sholpan-Ata qalasynda ótken Shanhaı Yntymaqtastyq Uıymyna (ShYU) múshe memleketterdiń dene shynyqtyrý jáne sport salasyna jaýapty mınıstrlikteri men vedomstvolary basshylarynyń keńesinde sóılegen sózinde aıtty.
Mınıstr is-sharanyń joǵary deńgeıde uıymdastyrylǵany úshin qyrǵyz tarapyna alǵys bildirip, Sholpan-Atada kezdesýdiń sımvoldyq mánine toqtaldy.
Óńirdiń halyqaralyq sporttyq yntymaqtastyqty damytýda mańyzdy alańǵa aınalǵany atap ótildi.
Sondaı-aq elderdi ortaq tarıhı-mádenı mura negizinde biriktiretin joba retinde Dúnıejúzilik kóshpendiler oıyndarynyń mańyzy erekshe ekenin jetkizdi.
Erbol Myrzabosynov ShYU elderi arasyndaǵy sport salasyndaǵy ózara is-qımyldyń kezeń-kezeńimen damyp kele jatqanyn jáne naqty nátıjelerge baǵyttalyp otyrǵanyn jetkizdi.
Sportshylardyń birlesken jarystarǵa turaqty qatysýy memleketter arasyndaǵy senim, ózara túsinistik pen áriptestikti nyǵaıtýǵa yqpal etedi.
Mınıstrdiń aıtýynsha, ShYU elderiniń sporttyq áleýeti zor. Bul tájirıbe almasýdan birlesken jobalardy júzege asyrýǵa kóshýge múmkindik beredi. Basym baǵyttar retinde mynalar ataldy:
* birlesken oqý-jattyǵý jıyndaryn ótkizý;
* jattyqtyrýshylar men sarapshylar arasynda tájirıbe almasý;
* jastar sportyn damytý.
Mınıstr Qazaqstannyń sportty damytý saıasatyn júıeli túrde júzege asyryp kele jatqanyn jáne halyqaralyq yntymaqtastyqty keńeıtýge ashyq ekenin atap ótti.
2026 jyly elimizde birqatar iri halyqaralyq jarys ótkizý josparlanyp otyr, oǵan ShYU elderiniń sportshylary shaqyrylǵan.
Sóz barysynda ulttyq sport túrlerin damytý máselesine erekshe nazar aýdarylyp, mádenı muranyń mańyzdy bóligi ári birlesken jobalar úshin perspektıvaly baǵyt ekeni aıtyldy. Sondaı-aq mınıstr «ShYU ashyq kýbogy» bastamasynyń júzege asyrylyp jatqanyna toqtaldy.
- 2026 jylǵy mamyr aıynda Almatyda golf týrnıri ótedi, oǵan uıymǵa múshe elderdiń ókilderi qatysady dep josparlanǵan. Osylaısha, Qazaqstan ShYU aıasyndaǵy sporttyq yntymaqtastyqty nyǵaıtýǵa jáne elder arasyndaǵy ózara yqpaldastyqtyń jańa tetikterin damytýǵa umtylysyn kórsetip otyr, - delingen habarlamada.
Osyǵan deıin Erbol Myrzabosynov elordada Mońǵolııanyń Mádenıet, sport, týrızm jáne jastar mınıstri Aldarjavhlan Jýkovpen kezdesip, Qazaqstannyń mońǵol týrısteri men seriktesteri úshin ashyq ekenin aıtqan bolatyn.
