Ulttyq salt-dástúr, ádet-ǵurypty nasıhattaýshylardyń mártebesi qandaı bolýy kerek - depýtat
ASTANA. KAZINFORM – Májilis depýtaty Erbolat Satybaldın ulttyq salt-dástúr men ádet-ǵurypty ustanýdy nasıhattaýshylardyń mártebesin anyqtaý máselesin kóterdi.
Májilistiń Áleýmettik-mádenı damý komıtetinde «Materıaldyq emes mádenı murany qorǵaýdy zańnamalyq qamtamasyz etý týraly» taqyrybynda dóńgelek ústel ótti.
«Zań paıdalanýǵa yńǵaıly bolýy kerek, sondyqtan negizgi materıaldyq emes mádenı muranyń aýqymyn belgilep alýymyz kerek dep oılaımyn. Tizimderi bar shyǵar, biraq bárin biriktirip ony qaı jerde paıdalanady osy zańda tolyq kórinýi kerek. Zańdy mindetti túrde ókiletti organ júrgizip otyrady, birneshe mınıstrlik bolatyn bolsa, olardyń arasyndaǵy mindetterdi tolyq, aıqyn jazylýy tıis, sebebi erteń «atqa jemdi kim salady» degen osy jerden týyndap qalýy múmkin. Odan keıin bul salt-dástúr, ádet-ǵurypqa qatysty bolǵannan keıin ony nasıhattaýshynyń mártebesin anyqtap, qoǵamdaǵy belgili bir rólin belgilep alýymyz kerek», - dedi Erbolat Satybaldın is-shara barysynda.
Odan ári halyq qalaýlysy mádenı murany qorǵaý máselesin kóterdi.
«Mysaly, jartylaı jalańash bizdiń ulttyq kıimimizdi kıip alyp, kıiz úıde bılegen qyzdarǵa biz eshteńe istegen joqpyz ǵoı, óıtkeni zań boıynsha biz olarǵa eshteńe isteı almaımyz. Sondyqtan bul jerde qorǵaý máselesi jáne biz ony qaı deńgeıde qorǵaımyz, ákimshilik bolmasa qylmystyq deńgeıge deıin aparamyz ba, osy máselelerdiń bárin osy zańda egjeı-tegjeıli qarap alýymyz kerek», - deıdi ol.
Eske salsaq, bıyl kıiz úıde qyzdardyń jartylaı jalańash bılegen vıdeosy áleýmettik jelide taraǵan edi. Qazaqtyń kıiz úıinde beıádep qylyǵymen masqaralaǵandardyń áreketi jeli qoldanýshylarynyń ashýyn keltirdi.
Osy oraıda Májilis depýtaty Samat Musabaev Bas Prokýratýra men Ulttyq Qaýipsizdik komıtetinen atalǵan beınerolıkke quqyqtyq baǵa berip, naqty shara qoldanýdy surady.
Sondaı-aq Mádenıet jáne aqparat mınıstri Aıda Balaeva kıiz úıde jartylaı jalańash bılegenderdiń vıdeosyna qatysty pikir bildirdi.
Keıin Bas prokýratýra atalǵan jaıtqa qatysty qylmystyq is qozǵalǵanyn habarlady.
