Ulttyq reıtıng agenttigi bızneske qoljetimdilikti arttyrady
ASTANA. KAZINFORM – Qarjy naryǵyn retteý jáne damytý agenttiginiń tóraǵasy Mádına Ábilqasymova kredıttik reıtıng agenttigin qurý bastamasyna qatysty pikir bildirdi.
Onyń aıtýynsha, kredıttik reıtıngter ınvestorlar, bankter jáne retteýshiler tarapynan kredıttik táýekelderdi baǵalaý men ınvestıtsııalyq sheshimder qabyldaýda keńinen qoldanylady.
- Jańa reıtıngtik agenttik qarjy naryǵy ınfraqurylymynyń negizgi elementine aınalady dep esepteımiz, – dedi agenttik tóraǵasy.
Mádına Ábilqasymova bul bastama, eń aldymen, qor naryǵyna shyǵatyn kompanııalar úshin mańyzdy ekenin atap ótti.
Onyń sózinshe, qazirgi tańda sheteldik kredıttik reıtıngterdi alý quny joǵary bolyp otyr, bul ásirese shaǵyn jáne orta bızneske aıtarlyqtaı kedergi keltiredi.
- Ulttyq reıtıngtik agenttik qurylǵan jaǵdaıda, osy qyzmetterdiń qunyn tómendetemiz dep senemiz. Bul qor naryǵyn damytýǵa jáne shaǵyn ári orta bıznestiń damýyna serpin beredi, – dedi ol.
Sondaı-aq agenttik tóraǵasy Ulttyq banktiń ne sebepti aktsıonerlik quryltaıshy retinde qatysatynyn túsindirdi.
- Negizgi maqsat – senimdi ınstıtýt qalyptastyrý. Eger biz tek quqyqtyq bazany ázirleýmen shektelsek, bul uzaq ýaqyt alýy múmkin. Sol sebepti Ulttyq bankpen birlesip osyndaı sheshim qabyldadyq. Bul qarjy sektorynyń ınfraqurylymdyq elementi bolady jáne Ulttyq bank onyń aktsıoneri retinde qatysady. Aldaǵy birneshe jylda onyń aktsıonerlikten shyǵý múmkindigi de qarastyrylady, – dedi Mádına Ábilqasymova.
Buǵan deıin Májilis kredıttik reıtıngterdiń sapasyna qatysty qujatty maquldady.
